Stratfor: Paşinyan seçkilərdə qalib gəlsə də, konstitusiya çoxluğu əldə edə bilmədi

ABŞ-ın tanınmış "Stratfor" araşdırma və analitika mərkəzi Ermənistanda keçirilən parlament seçkilərinin nəticələrini təhlil edib. Analitiklərin rəyinə görə, seçkinin nəticələri Baş nazir Nikol Paşinyana yenidən hökumət formalaşdırmağa və özünün əsas xarici siyasət xəttini davam etdirməyə imkan verəcək.

Bizim.Media xəbər verir ki, bu xəttə Azərbaycanla sülhün əldə olunması, Türkiyə ilə münasibətlərin normallaşdırılması və Qərblə əlaqələrin dərinləşdirilməsi daxildir.

Bununla belə, "Stratfor" hesabatında Ermənistanın daxili və xarici siyasətinə təsir edəcək bir neçə kritik məqamı vurğulayıb.

Paşinyanın rəhbərlik etdiyi hakim "Vətəndaş Müqaviləsi" partiyasının qazandığı deputat mandatlarının sayı müxalifətin dəstəyi olmadan ölkə konstitusiyasına dəyişikliklər etmək üçün yetərli deyil (konstitusiya çoxluğu əldə olunmayıb).

Bu vəziyyət, Azərbaycanın sülh müqaviləsi üçün əsas şərtlərdən biri kimi irəli sürdüyü "Ermənistan konstitusiyasından Azərbaycana qarşı ərazi iddialarının çıxarılması" tələbinin icrasını hüquqi baxımdan xeyli çətinləşdirəcək.

Seçkilərin nəticəsində ruspərəst müxalifətin parlamentdəki mövqeləri güclənib. Bu amil ölkədə daxili siyasi rəqabəti və gərginliyi artıracaq.

Güclü müxalifət fonunda Paşinyan hökuməti Rusiyanın siyasi və iqtisadi təzyiqlərinə qarşı daha həssas və müdafiəsiz vəziyyətə gələ bilər.

Bizim.Media