Milyarderlərin yeni dəbi: 130 min dollarlıq "qar otaqları" – FOTO

Ultra varlılar arasında yeni dəb şəxsi hovuz və ev kinoteatrlarını geridə qoyub.

Bizim.Media xəbər verir ki, The Guardian nəşri milyarderlər arasında populyarlaşan "qar otaqları"ndan bəhs edib.

Məlumata görə, "qar otağı" xüsusi avadanlıq vasitəsilə aşağı temperaturda otağın daxilində həqiqi qar yağışı yaradan qapalı məkandır. Bu texnologiya xizək kurortlarında istifadə olunan qar istehsalı sistemləri əsasında hazırlanıb.

Belə otaqlardan əsasən sauna prosedurlarından əvvəl istifadə olunur. İstifadəçilər xalatda oturaraq qarın yağmasını izləyir, daha sonra isti saunaya keçirlər.

İstehsalçılar bildirirlər ki, bu sistem insanın fiziki və psixoloji rahatlığına müsbət təsir göstərən dizayn elementi hesab olunur. Bununla yanaşı, mütəxəssislər qeyd edirlər ki, əsas fayda isti və soyuğun növbələşməsindən ibarət kontrast terapiyasıdır və qarın özünün xüsusi müalicəvi xüsusiyyətləri yoxdur. Nəşr yazır ki, bu cür otaqlar təkcə dəbdəbəli villalarda deyil, superyaxtalarda da quraşdırılır.

Məsələn, Səudiyyə Ərəbistanının vəliəhdi Mohammed bin Salmana məxsus olduğu bildirilən Serene superyaxtasında da şəxsi qar otağı mövcuddur.

Qar otaqlarının başlanğıc qiyməti təxminən 130 min ABŞ dollarıdır. Mərmər üzlüklər, süni qayalar və dekorativ ağaclar kimi əlavə seçimlər isə qiyməti xeyli artırır.

Məlumata görə, belə sistemlər həftədə təxminən 200 litr su sərf edir. İstehsalçıların iddiasına əsasən, istifadə olunan enerjinin 80 faizədək hissəsini digər ehtiyaclar, məsələn, hovuzun qızdırılması üçün yönləndirmək mümkündür.










Bizim.Media