ABŞ-da polisin güllələdiyi şəxs öldü - Etiraz aksiyaları başladı – FOTO-VİDEO

ABŞ-ın Madison şəhərində polis tərəfindən saxlanılan şəxsin ölməsindən sonra etiraz aksiyaları başlayıb.

Bizim.Media xəbər verir ki, bu barədə xarici KİV məlumat yayıb.

Polisin açıqlamasına görə, saxlanılarkən şübhəli şəxsin bıçaqla polis əməkdaşlarından birini yaraladığı bildirilir. Hüquq-mühafizə orqanları əvvəlcə onu elektroşok cihazı ilə zərərsizləşdirməyə çalışsalar da, bu cəhd nəticə verməyib və polis əməkdaşı atəş açıb.

Yaralanan şəxs xəstəxanaya çatdırılsa da, onun həyatını xilas etmək mümkün olmayıb.

Məlumata görə, hadisədə iştirak edən dörd polis əməkdaşının hamısı araşdırma müddətində inzibati məzuniyyətə göndərilib. Həmçinin müəyyən edilib ki, onlardan heç biri üzərində bədən kamerası daşımayıb.

Hadisənin videogörüntüləri sosial şəbəkələrdə yayıldıqdan sonra şəhərdə etiraz aksiyaları keçirilib. Aksiya iştirakçıları "Ədalət yoxdursa, sülh də yoxdur" şüarları səsləndiriblər.

Axşam saatlarında isə sakinlər hadisə yerinə gül və şam gətirərək həlak olan şəxsin xatirəsini yad ediblər.

Madison şəhərinin meri mərhumun ailəsinə başsağlığı verib və araşdırmanın tam şəffaf və ictimaiyyət qarşısında hesabatlı şəkildə aparılmasının vacibliyini vurğulayıb.



Bizim.Media