"Qələbə istəyiriksə, Vinisius meydanda olmalıdır"

"Real"ın baş məşqçisi Alvaro Arbeloa Çempionlar Liqasının "Monako" ilə oyunu ərəfəsində komandanın ulduz futbolçusu Vinisius Juniordan danışıb.

Bizim.Media xəbər verir ki, mətbuat konfransında jurnalistlərin suallarını cavablandıran mütəxəssis braziliyalı vingerin tənqidlərə rəğmən əsas heyətdəki yeri və əvəzlənməsi ehtimalı barədə qəti mövqe nümayiş etdirib:
 

"O, hazır olduğu və indiki səviyyədə oynadığı müddətcə meydanda olacaq. Vinisius fantastik və müstəsna futbolçudur. "Real"ın məşqçisi kimi, əgər qələbə qazanmaq şansımın olmasını istəyirəmsə, o mənə lazımdır. Vinisiusun meydanda olmasına ehtiyacım var".

Xatırladaq ki, Xabi Alonsonun istefasından sonra azarkeşlər komandadakı enişə və qeyri-sağlam mühitə görə Vinisiusu günahlandırırdılar.

Cari mövsümdə "kral klubu"nun heyətində 29 oyuna çıxan 25 yaşlı hücumçu 6 qol və 8 məhsuldar ötürmə ilə yadda qalıb. Onun klubla müqaviləsi 2027-ci ilin yayına qədər qüvvədədir.

Bizim.Media