Dəhşətli hadisə: Yaşlı kişi öz evini partlatdı - SƏBƏB

Bir neçə gün öncə Kerman əyalətində qeyri-adi və təhlükəli hadisə baş verib.

Bizim.Media “Didban-e” saytına istinadən xəbər verir ki, Fəryab şəhərindən 15 kilometr aralıda yerləşən kəndlərin birində yaşlı kişi oğulları ilə mübahisədən sonra evini qəsdən partladıb.

Məlumata görə, 38 və 40 yaşlı iki qardaş atalarını qocalar evinə yerləşdirmək istədiklərinə görə onunla mübahisə edib və qocanı evdə kilidləyərək polis bölməsinə müraciət ediblər. Polislər məsələni araşdırmaq üçün iki qardaşla birlikdə evə gediblər.

Bu müddətdə qoca kişi oğullarından qisas almaq məqsədi ilə qazı açaraq evi qazla doldurub və zirzəmidə gizlənib. Polislər və oğullar evə daxil olan kimi güclü partlayış baş verib. Hadisə nəticəsində iki polis və qocanın oğulları müxtəlif dərəcəli xəsarətlər alıblar. Yanğın zamanı polis əməkdaşları yaşlı kişini evin içində taparaq xilas ediblər.