"Air France" aviaşirkəti regionda təhlükəsizlik sahəsində vəziyyətin pisləşməsi ilə əlaqədar Ər-Riyad və Dubaya reyslərin dayandırıldığını elan edib.
Bizim.Media xəbər verir ki, bu barədə aviadaşıyıcı məlumat yayıb.
Qeyd olunub ki, aviaşirkət Səudiyyə Ərəbistanının Ər-Riyad şəhərinə və əks istiqamətdə olan reysləri iyulun 25-i də daxil olmaqla ləğv edir, həmçinin BƏƏ-nin Dubay şəhəri ilə hava rabitəsini iyulun 28-dək dondurur.
Bundan əlavə, şirkət Beyruta və əks istiqamətdə uçuşların dayandırılması müddətini avqustun 2-dək uzadıb (bu istiqamət üzrə reyslər martın 1-dən bəri yerinə yetirilmir).
"Air France" rəsmiləri bildiriblər ki, uçuşların bərpası "sürətlə dəyişən" təhlükəsizlik vəziyyətinin yenidən qiymətləndirilməsindən asılı olacaq. Aviaşirkətdən "Air France sərnişinlərin və ekipajların təhlükəsizliyinin onun ən ali prioriteti olduğunu bir daha vurğulayır", — deyə bəyanatda qeyd olunub.
Bu addım ABŞ-nin İranla gərginliyin artması fonunda regiona əlavə qırıcı təyyarələr göndərəcəyini bəyan etməsindən sonra atılıb.
Bundan əvvəl ABŞ, Kanada, Almaniya, Honkonq, Sinqapur və Böyük Britaniya da daxil olmaqla, dünyanın müxtəlif ölkələrindən olan bir sıra beynəlxalq aviaşirkətlər ABŞ və İran arasındakı hərbi münaqişə səbəbindən Yaxın Şərq ölkələrinə uçuşları artıq dayandırıb.
Bizim.Media
