Gəncədə Şəhid Orxan Əsgərovun yas mərasimi keçiriləcək - FOTO

Şəhid Orxan Əsgərovun Gəncədə ata evində də yas mərasimi keçiriləcək.

Şəhər rəhbərliyi, Türkiyənin Gəncədəki Baş konsulu Rəcəp Öztop, Gəncə Şəhər İcra Hakimiyyətinin başçısı, İcra Aparatının məsul əməkdaşları, bələdiyyə sədrləri şəhid Orxan Əsgərovun Gəncədə keçiriləcək yas mərasiminin hazırlıq işləri ilə əlaqədar olaraq şəhidin ata evini ziyarət edib.

Bizim.Media-nın yerli bürosunun məlumatına görə, Gəncə Şəhər İcra Hakimiyyətinin başçısı Niyazi Bayramov şəhidin yaxınlarına başsağlığı verib, keçiriləcək mərasimlə əlaqədar olaraq şəhidimizin ailə üzvlərinin istəyinə uyğun aidiyatı üzrə müvafiq tapşırıq və tövsiyələr verib.

Xatırladaq ki, 27 yanvar 2023-cü il tarixində Azərbaycanın İrandakı səfirliyinə terror hücumu olub. Terroru törədən şəxs “Kalaşnikov” markalı avtomat silahla mühafizə postunu yararaq, səfirliyin Mühafizə Xidmətinin rəisi, baş leytenant Orxan Əsgərovu qətlə yetirib.
Gəncə şəhərindən olan şəhid Orxan Əsgərovun nəşinin bu gün axşam saatlarında İrandan Azərbaycana gətiriləcəyi gözlənilir.

Qeyd edək ki, Orxan Əsgərovun Bakının Yeni Yasamal qəsəbəsindəki evində və Gəncə şəhərindəki ata evində yas mərasimləri keçirilir. Şəhid Orxan Əsgərov II Şəhidlər xiyabanında torpağa tapşırılacaq.

Məqsəd Rəhimov, Bizim.Media, Qərb bürosu