Ukrayna Silahlı Qüvvələrinin pilotsuz sistemlər bölməsinin komandanı, "Madyar" ləqəbli Robert Brovdi Kerç bərə keçidinin daşıma imkanlarının 75 faizinin sıradan çıxarıldığını iddia edib.
Bizim.Media xəbər verir ki, onun sözlərinə görə, əməliyyata qədər keçidə beş bərə xidmət göstərirdi.
Hazırda "Yeysk" və SKS One bərələrinin məhv edildiyi və bərpasının mümkün olmadığı, "Mariya" bərəsinin isə sıradan çıxarıldığı və yenidən istismara qaytarılmayacağı bildirilir.
"Madyar"ın iddiasına əsasən, "Lavrentiy" və "Panagiya" bərələri zərbələrdən sonra yalnız özüyeriməyən barjalar kimi istifadə olunur ki, bu da onların daşıma imkanlarını təxminən iki dəfə azaldıb.
O bildirib ki, hücumlardan əvvəl dörd bərə sutka ərzində 180-250 nəqliyyat vasitəsi daşıya bilirdi və daşımaların təxminən 80 faizi Rusiya Müdafiə Nazirliyinin ehtiyaclarına xidmət edirdi.
Bizim.Media
