ABŞ Səudiyyə Ərəbistanına uranı zənginləşdirməyə icazə verəcək?

Tramp administrasiyası Səudiyyə Ərəbistanına dinc nüvə enerjisi sahəsində əməkdaşlıq sazişi çərçivəsində uranı müstəqil şəkildə zənginləşdirməyə icazə verməyə ilkin razılıq verib.

Bizim.Media xəbər verir ki, CNN-in mənbələrə istinadən verdiyi məlumata görə, Amerika-Səudiyyə danışıqları oktyabr ayında başa çatıb, lakin Ər-Riyadın mülki nüvə proqramına dəstəyi nəzərdə tutan saziş layihəsi hələlik prezidentin imzasını gözləyir.
 

Məlumata görə, saziş Səudiyyə Ərəbistanından MAQATE ilə "Əlavə Protokol" kimi tanınan standart gücləndirilmiş təminat sazişinin qəbul edilməsini tələb etmir. Bunun əvəzinə, təminatlar ABŞ və Səudiyyə Ərəbistanı arasında imzalanacaq ayrıca sazişlə tənzimlənəcək.

Mütəxəssislər xəbərdarlıq edirlər ki, ciddi təminatların olmaması Ər-Riyad üçün potensial olaraq nüvə silahı yaratmağa yol aça bilər.

Səudiyyə Ərəbistanının vəliəhdi bin Salman daha əvvəl bəyan etmişdi ki, əgər İran nüvə bombasına sahib olarsa, krallıq da özünün nüvə silahını yaratmağa başlaya bilər.

Bizim.Media