Türkiyənin Mardin şəhərində dəhşətli cinayət hadisəsi baş verib.
Bizim.Media xəbər verir ki, rayondakı çoxmənzilli binada yaşayan Kaya ailəsinin 3 üzvü başından güllələnib.
Nəticədə 5 yaşlı uşaq, ata və anası ölü vəziyyətdə tapılıb.
Hadisə ailədən heç bir xəbər ala bilməyən qonşular sayəsində üzə çıxıb. Belə ki, evə daxil olan qonşular 37 yaşlı Mehmet Kayanı, 33 yaşlı həyat yoldaşı Berna Kayanı və 5 yaşlı qızları Samyeli Kayanı ölü halda tapıblar. Bundan sonra polisə məlumat verilib.
Hadisə yerinə polis və digər xilasetmə qrupları gəlib. Ailə üzvlərinin cəsədi ekspertiza üçün Mardin Təlim və Araşdırma Xəstəxanasının morquna aparılıb.
İstintaq çərçivəsində 2 nəfər qonşu saxlanılıb və ailənin qonşusu M.C.-da hadisədə istifadə olunduğu ehtimal olunan silah tapılıb. Vəkil Nurullah Öner bildirib ki, M.C. “Sübutları məhv etmə” və “Qəsdən adam öldürmə” ittihamı ilə həbs olunub. Ona kömək etdiyi iddia edilən V.E. də saxlanılıb və polis əməliyyatlarından sonra eyni ittihamla həbs edilib.
M.C istintaqa verdiyi ifadəsində bildirib ki, əslində Mehmet Kaya həm yoldaşını, həm də qızını özü öldürüb.
“Mehmet mənim qonşumdur. Təxminən 10 ildir tanışıq. Mehmet məndən ona silah tapmağımı xahiş etdi. Mən də təxminən 10 gün əvvəl çiçəkçi olan bir dostumdan 17 min TL-yə 1 ədəd silah aldım və bir gün sonra Mehmetə verdim. Mehmetin niyə silah istədiyini bilmirəm.
Bazar ertəsi, 24 noyabrda Mehmet məni çağırdı və evinə çay içməyə dəvət etdi.
Evə girməzdən əvvəl mənə içində 2 qızıl bilərzik, 2 üzük, 1 sırğa, bir miqdar nağd pul, saat və təsbeh olan bir paket verdi. Niyə verdiyini soruşanda “Sənin üçün hədiyyədir”, - dedi. Sonra evə girdik, çay içdik və söhbət etdik.
Daha sonra, adı Mehmet olan başqa bir tanışım onu çağırdı və bir qadının gələcəyini, həmin qadını Urfadan götürüb Diyarbakıra aparmasını istədi. Mehmet də bunu qəbul etdi. Sonra bu səbəbdən həyat yoldaşı Berna ilə mübahisə etdi. Mübahisə bitdikdən sonra söhbətimizə davam etdik.
Sonra birdən Mehmet mənim ona verdiyim silahı çıxardı, sol əlinə aldı və oturub kompüterlə məşğul olan Bernaya atəş açdı. Daha sonra qızı “Ata, nə edirsən?”, - dedi. Mehmet bu dəfə qızına da atəş açdı. Daha sonra özünü vurdu”.
Əyalət Polis İdarəsi tərəfindən yaradılmış xüsusi qrup tərəfindən aparılan ilkin araşdırma zamanı bir sıra faktlara diqqət çəkib.
Belə ki, qapıda heç bir məcburi giriş izi tapılmayıb. Evdən cəmi iki tükənmiş patron tapılıb və hadisədə istifadə olunan silah evdə tapılmayıb.
Ana və atanın meyitləri otağın ortasında, 5 yaşlı Samyeli isə divanda tapılıb.
Həbs edilən qonşu "qısqanclıq və intihar" versiyasını irəli sürüb.
Belə ki, o, ifadəsində qətli Mehmet Kayanın üzərinə yıxmağa çalışaraq evdə "qısqanclıq böhranı"nın başladığını iddia edib.
Şübhəli şəxs iddia edib ki, hadisədən bir qədər əvvəl “Aynur” adlı qadının telefon zəngi cütlük arasında mübahisəyə səbəb olub.
Şübhəlinin sözlərinə görə, hadisə baş verən gün Ankaradan Mehmet Kayaya kişi dostu zəng edib. Mirhan C.-nin ifadəsinə görə, telefonla danışan şəxs Mehmet Kayanın Urfaya gələn sevgilisi Aynurla görüşməsini və onu Diyarbəkirə aparmasını istəyib. Mehmet Kaya təklifi qəbul edəndə evdə gərginlik artıb.
Şübhəli şəxs Mehmet Kayanın həyat yoldaşı Berna Kayanın telefon danışığına şahid olduğunu və qadının şiddətli reaksiya verdiyini iddia edib. Açıqlamaya görə, Berna Kaya ərinə "Gedə bilməzsən" deyə qışqırıb və cütlük bu məsələ ilə bağlı şifahi mübahisə edib.
"Mehmet başqa qadınla münasibətdə olduğu üçün arvadı ilə mübahisə edib. Mübahisə zamanı o, əvvəlcə arvadını, sonra qızını öldürdü. Mənə dönüb "bunu heç kimə demə, yoxsa səni də öldürəcəm" dedi və sonra intihar etdi. Qorxdum, silahı götürüb kanalizasiyaya atdım" – deyə qonşu ifadəsində bildirib.
Ailənin yaxınları isə itmiş qızıla işarə edir və hadisənin qətl olduğunu iddia edir.
Naibə, Bizim.Media
