Bu gün İrəvanda Azərbaycan və Ermənistan vətəndaş cəmiyyəti nümayəndələrinin görüşü baş tutub.
Bizim.Media xəbər verir ki, bu barədə Ermənistan Təhlükəsizlik Şurası məlumat yayıb.
MÖVZU İLƏ BAĞLI:
AZAL-ın təyyarəsi uzun fasilədən sonra İrəvanda – FOTO
Görüşdə Ermənistan Təhlükəsizlik Şurasının katibi Armen Qriqoryan da iştirak edib.
Dəyirmi masada Azərbaycan tərəfini Fərhad Məmmədov, Rusif Hüseynov, Ramil İsgəndərli, Kamalə Məmmədova, Ermənistan tərəfini isə Areq Koçinyan, Boris Navasardyan, Naira Sultanyan, Narek Minasyan və Samvel Meliksetyan təmsil ediblər.
Qriqoryan tədbirin əhəmiyyətini vurğulayıb və belə görüşlərin İrəvanla Bakı arasında normallaşma prosesinin tərkib hissəsi kimi keçirilməsini yüksək qiymətləndirərək, onların iki ölkə cəmiyyətləri arasında etimadın möhkəmləndirilməsi və birbaşa əlaqələrin qurulmasına yönəldiyini qeyd edib.
Vətəndaş cəmiyyətinin nümayəndələri də öz növbəsində tədbirin təşkilinə və müsbət atmosferin yaradılmasına görə Ermənistan tərəfinə təşəkkür ediblər.
Görüş iştirakçıları iki ölkə arasında qarşılıqlı etimadın və əməkdaşlığın möhkəmləndirilməsinə yönəlmiş təşəbbüsləri müzakirə ediblər.
Tərəflər hər iki cəmiyyət üçün maraq doğuran bir sıra məsələləri, o cümlədən Ermənistanla Azərbaycan arasında sülh prosesinin perspektivlərini, humanitar məsələləri, münasibətlərin normallaşdırılması kontekstində iqtisadi və logistik imkanları, həmçinin etimadın daha da möhkəmləndirilməsi tədbirlərini müzakirə ediblər. Müzakirələr zamanı planların hazırlanmasına və qrupun birgə təşəbbüslərinin gələcək istiqamətlərinin müəyyənləşdirilməsinə xüsusi diqqət yetirilib.
Görüşün ikinci hissəsində Qriqoryan sualları cavablandırıb.
Bizim.Media
