Dibala futboldan uzaqlaşdırıla bilər - SƏBƏBİ

"Roma"nın hücumçusu Paulo Dibala sabiq klubu "Yuventus"la gizli razılaşmaya görə bir ay müddətinə futboldan uzaqlaşdırıla bilər. 

Bizim.Media xarici KİV-ə istinadən xəbər verir ki, bu gün polis bu məsələyə görə Dibalanı dindirib. 

Bildirilib ki, İtaliya prokurorluğu 2020-ci ildə koronavirus pandemiyası zamanı futbolçuların maaşlarını azaltmaq üçün “Yuventus”un maliyyə fırıldaqçılığı ilə bağlı işin araşdırılmasını davam etdirir.

Müstəntiqlərə görə, Turin klubunun əvvəlcə bildirdiyi kimi, Dibala həmin dövr üçün maaşdan imtina etməyib, lakin ödənişi təxirə salmağa razılaşıb və sonradan 1,9 milyon avroluq iki ödəniş şəklində tələb olunan məbləği alıb. 

İtaliyanın İdman Ədaləti Məcəlləsinə əsasən, klublara bu şəkildə təzminat ödəmək qadağandır. Oyunçular həmçinin bu cür kompensasiyaları qəbul edə bilməzlər. Əgər belə qayda pozuntusu qeydə alınarsa, həmin futbolçu ən azı bir ay müddətinə futboldan kənarlaşdırılacaq. 
Bundan əvvəl İtaliya Futbol Federasiyasının qərarına əsasən, "Yuventus" futbolçuların maaşları ilə bağlı maliyyə saxtakarlıq etdiyinə görə komandanın A Seriyasında 15 xalı silinib. Qeyd edək ki, Dibala 2015-2022-ci illərdə "Yuventus"un formasını geyinib. 

Bizim.Media