ABŞ Prezidenti Donald Tramp Danimarka hökumətinin son 20 il ərzində Qrenlandiya üçün guya Rusiya tərəfindən yaranan təhlükəni aradan qaldıra bilmədiyini iddia edib.
Bizim.Media xəbər verir ki, Tramp bu barədə Truth Social sosial şəbəkəsində yazıb.
“20 il ərzində NATO Danimarkaya deyirdi: ‘Siz Qrenlandiya üçün Rusiya təhlükəsini aradan qaldırmalısınız’. Təəssüf ki, Danimarka bununla bağlı heç nə edə bilmədi. İndi isə vaxt çatıb və bu məsələ həll olunacaq”, – deyə o, qeyd edib.
Tramp bildirib ki, ABŞ Böyük Britaniya, Almaniya, Danimarka, Niderland, Norveç, Finlandiya, Fransa və İsveçdən idxal olunan mallara 10 faiz rüsum tətbiq etməyə başlayacaq. Bu rüsumlar tərəflər Vaşinqtonun Qrenlandiyanı “tam və qəti şəkildə əldə etməsi” ilə bağlı razılaşmaya gələnədək qüvvədə qalacaq. Qərar fevralın 1-dən qüvvəyə minəcək, iyunun 1-dən etibarən isə rüsum dərəcəsi 25 faizə yüksələcək.
Qrenlandiya Danimarkanın tərkibində muxtar ərazi statusuna malikdir.
1951-ci ildə Vaşinqton və Kopenhagen NATO çərçivəsində müttəfiqlik öhdəliklərinə əlavə olaraq adanın müdafiəsi haqqında saziş imzalayıblar. Həmin sazişə əsasən, ABŞ Qrenlandiyanı mümkün xarici təcavüzdən qorumaq öhdəliyini üzərinə götürüb.
Bizim.Media
