Bilgəh qəsəbəsində, “Amburan Mall”un ətrafında xaski cinsinə məxsus it tapılıb.
Bizim.Media-nın əldə etdiyi məlumata görə, xaskinin qulağındakı nömrəli etiket onun ev heyvanı olduğunu müəyyən edir.
Bir neçə gündür ki, “Cake Bake” restoranının ətrafında dolaşan itə həm işçilər, həm müştərilər diqqət göstərir, ona qida və su verir. Küçədə yaşaması çətin olan bu cinsin sahibi hələ tapılmayıb.
Ev heyvanı kimi baxıma öyrəşmiş xaskinin sahibsiz qaldıqda həyatı təhlükəyə məruz qala bilər. Buna görə də heyvanın sahiblərinin tez bir zamanda tapılması vacibdir.
Qeyd edək ki, xaski (Siberian Husky) Sibir mənşəli it cinsidir. Orta ölçülü, atletik bədən quruluşuna və qalın tüklərə malikdir. Gözləri mavi, qəhvəyi və ya bəzən fərqli rəngli ola bilər.
Xaraktercə enerjili, ağıllı və oyunsevərdir. Tək qalmağı sevmir, daim diqqət və hərəkət tələb edir. Gündəlik uzun gəzinti və aktivlik onun üçün vacibdir.
Bizim.Media
