Bakının Qarabağ küçəsi təmirdən sonra – FOTO/VİDEO

Avtomobil Yolları Dövlət Agentliyi tərəfindən Bakının Nərimanov rayonunun Qarabağ küçəsi əsaslı şəkildə təmir edilib.

Bizim.Media xəbər verir ki, bu barədə Agentlikdən bildirilib.

Məlumata görə, Qarabağ küçəsinin əsaslı şəkildə təmir olunmuş Gülarə Qədirbəyova və Əliağa Vahid küçələri arasında yerləşən hissəsinin uzunluğu 900 metr təşkil edir.

Genişləndirmə aparılmaqla icra olunan təmir işləri zamanı mövcud piyada səkiləri 3 650 kvadrat metr sahədə bərpa olunub, küçə boyu hər bir tərəfdə və yol ayrıcına 4 min p/m-dən artıq yeni səki daşı düzülüb.

Küçə boyu 12 min kvadrat metr sahədə 2 laydan ibarət yeni asfalt-beton örtüyü döşənib.

Layihə çərçivəsində səth sularının yolun hərəkət hissəsindən kənarlaşdırılması üçün mövcud yağış-kanalizasiya sistemi bərpa olunub, 40 p/metr boru, 18 yeni yağış barmaqlığı quraşdırılıb, kommunikasiya xətlərinin 42 baxış qapağı yenisi ilə əvəz olunub.

Bundan başqa küçə boyu yol ayrıcında yerləşən yaşıllıq ərazi abadlaşdırılıb, vətəndaşların yaşıllıq ərazi ilə rahat və təhlükəsiz hərəkəti üçün 900 metr uzunluğunda xüsusi piyada zolağı salınıb.
Son mərhələdə isə küçə zəruri yol nişanları, üfiqi nişanlanma xətləri, piyada zolaqları və parkinq yerləri ilə təmin olunaraq müasir görkəmdə vətəndaşların istifadəsinə verilib.

Bizim.Media