Binəqədi rayonunda yeni yaradılan küçələrdən birinə şəhid jurnalist Məhərrəm İbrahimovun adı verilib.
Bizim.Media xəbər verir ki, bu barədə informasiyanı mərhumun qardaşı Əskər İbrahimov yayıb.
Onun sözlərinə görə, küçə M.İbrahimovun yaşadığı ünvan ərazisində yerləşir:
“Binəqədi Rayon İcra Hakimiyyətinin təqdimatı əsasında Bakı Şəhər İcra Hakimiyyətinin başçısı Eldar Əzizovun sərəncamı ilə Rəsulzadə qəsəbəsində yaradılan yeni küçəyə qardaşımın adı verilib”.
Qeyd edək ki, bu ilin iyunun 4-də işğaldan azad olunmuş ərazilərdə çəkilişə gedən qrup Kəlbəcər rayonunun Susuzluq kəndi ərazisində tank əleyhinə minaya düşüb.
Nəticədə AzTV-nin operatoru Sirac Abışov, AZƏRTAC-ın müxbiri Məhərrəm İbrahimov və Kəlbəcər Rayon İcra Hakimiyyəti başçısının Susuzluq kənd inzibati dairəsi üzrə icra nümayəndəsinin müavini Arif Əliyev həlak olub, dörd nəfər yaralanıb.
Prezident İlham Əliyev iyunun 14-də imzaladığı sərəncama əsəsən, işğaldan azad olunan ərazilərdə vəzifə borcunu yerinə yetirmiş Abışov Sirac Abış oğlu, Əliyev Arif Ağalar oğlu və İbrahimov Məhərrəm Əli oğlu 3-cü dərəcəli “Vətənə xidmətə görə” ordeni ilə təltif edilib.
Bizim.Media
