Rayonun turizm-istirahət məkanlarından olan Nohur gölün kənarında hələlik şəxsiyyəti məlum olmayan insana məxsus şəxsi əşya və geyim dəsti tapılıb.
Bizim.Media-nın yerli bürosu xəbər verir ki, rayonun Nohurqışlaq kəndi ərazisində yerləşən Nohur göldə şəxsiyyəti bəlli olmayan bir nəfərin batma ehtimalı haqda Fövqəladə Hallar Nazirliyinin Böhran Vəziyyətlərində İdarəetmə Mərkəzinə məlumat daxil olub. Qeyd olunur ki, Nohur göl su anbarı ətrafında batdığı ehtimal olunan şəxsin telefonu, şəxsiyyət vəsiqəsi və paltarları gölün kənarda aşkarlanıb.
Dərhal hadisə yerinə Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin və Şimal-qərb Regional Mərkəzinin xilasediciləri cəlb olunub.
Hazırda əraziyə polis əməkdaşları nəzarət edir. FHN-in şimal-qərb Regional Mərkəzinin xilasediciləri isə axtarışlara cəlb olunub.
Zərurət yaranacağı təqdirdə axtarışlara dalğıcların da cəlb olunması nəzərdə tutulur.
Tural Rasimoğlu, Bizim.Media, Şimal-Qərb bürosu
