Bulvarda sökülən atraksionların yerinə niyə yeniləri gətirilmir? – Rəsmi AÇIQLAMA

Xeyli müddətdir ki, Dənizkənarı Bulvarın ərazisində fəaliyyət göstərən çox sayda atraksion yığışdırılıb. Onların yerində indi kafe və restoranlar yerləşir. 

Qeyd edək ki, bir neçə il əvvəl bu ərazidə 40-a yaxın atraksion var idi. 

Atraksionların fəaliyyətinin yenidən bərpa olunması düşünülürmü?

Dənizkənarı Bulvar İdarəsinin mətbuat katibi Əfsanə Mehdiyeva Bizim.Media-nın sorğusuna cavab olaraq bildirib ki, bulvar ərazisindən yığışdırılan atraksionlar müasir tələblərə cavab verməyən, istismar müddətini başa vurmuşdu:

“Köhnəlmiş attraksionların yığışdırılması həm də təhlükəsizlik baxımından vacib idi. Onların yeni nəsil atraksionlarla əvəzlənməsi istiqamətində işlər aparılır. İlin əvvəlində azyaşlılar üçün bir neçə yeni attraksion, gəzinti qatarları istifadəyə verilib”. 
“Bundan əlavə mart ayında Panorama attraksionu əsaslı təmir olunduqdan sonra yenidən istifadəyə verilib.  Qeyd edək ki, attraksion yalnız küləkli hava şəraitində işləmir” – deyə, qurum sözçüsü bildirib.

Nuranə Daxilqızı, Bizim.Media