Şəkidə sakinlərə məxsus tövlələr yandı - FOTO

Şəkinin Baltalı kəndində iki kənd sakininə məxsus tövlədə yanğın olub. 

Bizim.Media-nın yerli bürosu xəbər verir ki, hadisə yerinə Fövləladə Hallar Nazirliyinin yanğından mühafizə xidmətinin əməkdaşları cəlb olunub.

Yanğın nəticəsində 84 yaşlı Fikrət Cəlilova məxsus ümumi sahəsi 180 kvadratmetr tövlənin yanar konstruksiyaları, çardağına yığılmış 6 ton ot bağlaması, 2 ton dənli bitki – vələmir yanıb.
Həmçinin yanğının baş verdiyi tövləyə bitişik olan 57 yaşlı Sənəm Quliyevaya məxsus ümumi sahəsi 120 kvadratmetr olan tövlənin dam örtüyünün yanar konstruksiyaları 60 kvadratmetr sahədə və çardağına yığılmış 3 ton ot bağlamasının 1 tonu da yanıb. 

Yanğından tövlənin və ot bağlamalarının qalan hissəsi mühafizə olunub. Hadisə nəticəsində xəsarət alan olmayıb, hadisənin qısaqapanma nəticəsində baş verdiyi ehtimal olunur. 

Faktla bağlı araşdırma başlanılıb.








Tural Rasim oğlu, Bizim.Media, Şimal-Qərb bürosu