Şəkidə Azərbaycan Gimnastika Federasiyasının 20 illiyi qeyd olunacaq - FOTO

Şəki Olimpiya İdman Kompleksinin və Mingəçevirdə yerləşən “Qədiroğlu” idman klubunun bədii gimnastika bölməsinin üzvləri Milli Gimnastika Arenasında keçirilən təlim-məşq toplanışına cəlb edilib.

Bu barədə Bizim.Media-ya Şəki Olimpiya İdman İdman Kompleksindən məlumat verilib.

Bildirilib ki, bir həftə davam edən məşqlərdə ümumilikdə hər iki komandadan 15 idmançı iştirak edib.

Məşqlərin təşkili idmançıların hazırlıq səviyyəsinin gücləndirilməsi, eləcə də 8-11 dekabr tarixlərində Şəki şəhərində keçiriləcək Azərbaycan Gimnastika Federasiyasının yenidən qurulmasının 20 illiyinə həsr olunmuş birgə yarışlar çərçivəsində təşkil ediləcək bədii gimnastika üzrə 27-ci Azərbaycan birinciliyinə hazırlıq xarakteri daşıyır.

Bizim.Media-nın yerli bürosu bildirir ki, Şəki Olimpiya İdman Kompleksində 2021-ci, “Qədiroğlu” idman klubunda isə 2019-cu ildən bədii gimnastika bölməsi fəaliyyət göstərir.

Məlumat üçün bildirək ki, bölgələrdə gimnastikanın inkişafı çərçivəsində müxtəlif regionlardan gimnastlar paytaxtda mütəmadi olaraq təlim-məşqlərdə iştirak edir.

Gələcəkdə ixtisaslı mütəxəssislər bölgələrə üz tutacaq və bu idman növünün sirlərinə daha dərindən yiyələnmək şansı əldə edəcəklər. İlk belə layihələrdən birinin Şəkidə reallaşdırılması planlaşdırılır.

Yeri gəlmişkən, dekabrın 9-u saat 16:00-da Şəki Olimpiya İdman Kompleksində Azərbaycan Gimnastika Federasiyasının yenidən qurulmasının 20 illik yubileyinə həsr olunmuş gimnastikanın 6 növü üzrə birgə milli yarışların açılış mərasimi təşkil olunacaq.
Açılış mərasimində öz çıxışlarını nümayiş etdirəcək dünya gimnastika ulduzları da yer alır.

Tural Rasim oğlu, Bizim.Media, Şimal-Qərb bürosu