Federasiya Şurasının 10 dekabr iclasında senatorlar Vətən Qəhrəmanları Günü münasibətilə Rusiya Qəhrəmanı adını alanları təbrik ediblər. Mərasim zamanı gözlənilmədən məlum olub ki, “Qızıl Ulduz” medallarından biri Ukraynanın sabiq Ali Rada deputatı, hazırda isə Həştərxan vilayətindən senator olan Andrey Derkaça verilib.
Bizim.Media xəbər verir ki, bu barədə ASTRA məlumat yayıb.
Andrey Derkaç Dnepr şəhərindəndir. O, UkraynanınTəhlükəsizlik Xidmətinin (UTX) keçmiş rəhbəri Leonid Derkaçın oğludur və Rusiya Təhlükəsizlik Nazirliyi Akademiyasını (indiki FTX Akademiyası) bitirib.
Karyerasına Ukraynanın icra hakimiyyətində başlayan Derkaç daha sonra Ali Radaya deputat seçilib və 1998-ci ildən etibarən hər çağırışda yenidən seçilib — “Əməkçi Ukrayna”, Regionlar Partiyası və bitərəf namizəd kimi. O həmçinin “Enerqoatom”a və “Ukratomprom” konserninə rəhbərlik edib.
2022-ci ilin sentyabrında Derkaç Ukraynada dövlətə xəyanət və qanunsuz varlanma ittihamları ilə axtarışa verilib.
İstintaq iddia edir ki, o, 2019–2022-ci illər ərzində Ukraynaya qarşı yönəlmiş fəaliyyətə görə Rusiya güc və kəşfiyyat strukturlarından ən azı 567 min dollar alıb. 2023-cü ilin yanvarında Ukrayna prezidenti Volodimir Zelenski onu Ukrayna vətəndaşlığından məhrum edib, bundan sonra Ali Rada onun deputat səlahiyyətlərinə xitam verib.
Bizim.Media
