“SOY” productionun təsisçisi, MTV kanalının bədii rəhbəri Siyavuş Hüseynli martın 22-də axşam saat 18:00 radələrində Abşeron rayonu ərazisində yol-nəqliyyat hadisəsi nəticəsində dünyasını dəyişən əməkdar mədəniyyət işçisi, tanınmış televiziya prodüseri, rejissor Oqtay Əliyevin ölümündən danışıb.
Bizim.Media xəbər verir ki, o, bu haqda qonaq olduğu “Səhər mərkəzi” verilişində məlumat verib.
S.Hüseynli bildirib ki, O.Əliyev avtomobili idarə edən zaman huşunu itirib:
“Belə bir məlumatlar yayıldı ki, güya Oqtay ürəyindən əməliyyat olunub. Amma bu yalandır. O, ürəyindən əməliyyat olunmayıb. Oqtayın ölümü ilə bağlı analizlərin cavabı təqdim olunmalıdır. Oqtay sükan arxasında oduğu zaman hüşünü itirib. Damar tıxanması olub və ya infarkt keçirib... Bəlli deyil. Oqtay huşunu itirdiyinə görə idarəetməni itirib və qəza baş verib. Hadisədən sonra Oqtayı çağırsalar da, cavab verməyib və dünyasını dəyişib”.
Proqramın digər qonağı Xalq artisti Mübariz Tağıyevin “Yuxuya gedib?” sözlərinə Siyavuş Hüseynli “Xeyr, yuxuya getməyib. Yuxu olsaydı... Onu o qədər səsləyib, çağırıblar. Mehriban xanım (Xalq artisti Mehriban Zəki eyni avtomobildə O.Əliyevlə olub – red.) və Dilarə xanım (O.Əliyevin həyat yoldaşı Əməkdar artist Dilarə Əliyeva – red.) çağırsalar da, cavab verməyib. Huşu getmişdi. Həkimlər Oqtayın ölümü ilə bağlı yaxın zamanda dəqiq açıqlama verəcəklər” cavabını verib.
Qeyd edək ki, O.Əliyev martın 23-də Qurd Qapısı qəbiristanlığında torpağa tapşırılıb.
Rəşad Əliyev, Bizim.Media
