“Mən Nəcməddini tanıyanda o, artıq Goranboyda briqada komandiri idi”x9d

Keçmiş daxili işlər naziri İsgəndər Həmidovun Moderator.az-a müsahibəsinin ikinci hissəsini təqdim edirik:

Əvvəli bu linkdə--- ( //moderator.az/index.php?xeber=76875 )

 -Rusiya da öz vətəndaşına ”“Dilqəmə sahib çıxmadı...

 -Rusiya tarix boyu erməninin dayağı olub və ermənini bir qancıq it kimi üstümüzə qısqırdıb. Amma Rusiyanı bir kənara qoyuram. Əsas məsələ Azərbaycanın öz vətəndaşına sahib çıxması məsələsidir. Məndə olan məlumata görə rəsmi Bakı gerçəkdən də bütün cəbhələrdə diplomatik cəhdlər edib. Amma ağılı başında olanlar bilir ki, ermənilər xoşluqla Dilqəmgili qaytaran deyil. Onları bizləməsən donuz darıdan çıxmadığı kimi nə işğal etdikləri torpaqlardan çəkilən deyillər, nə mənfur niyyətlərindən. Qırmızı Xaçdan da Dilqəmgili istəməyi doğru saymıram. Onların missiyası başqadır və hətta bu qurum ermənipərəst olmasa belə bunu etmək imkanında da deyil. Bir də onların Dilqəmgildən ailələrinə gətirdikləri məktub da formal bir prosedurdur. Axı məntiqlə Dilqəmlə Şahbaz necə desin ki, burda bizə amansız işgəncə verirlər. Siz Dilqəmgilin əvvəlki və sonrakı şəkillərini görmədinizmi? Dağ kimi oğullar şam kimi əriyib çöpə dönüblər. Bu müqayisə appaçıq onların ordakı vəziyyətlərini və aqibətlərini göstərir. Amma təsəvvür edin ki, o boyda işgəncəyə baxmayaraq Dilqəm məhkəmədə ermənilərin üzünə kişi kimi sözlər deyir, onları işğalçı adlandırır və öz ata-baba yurduna getməklə heç bir cinayət törətmədiyini bildirir. Bunu deməyə hər oğulun dizi, cəsarəti çatmaz.

-Rəsmi Bakı son vaxtlar Vaşinqtona qarşı xeyli aqressiv və emosional davranış sərgiləyir.

-(gülür) Doğrudan da gülməlidir. Həm gülməlidir, həm də acınacaqlı. Amma mən bu cür aqressiv davranışı başqa şeylə əlaqələndirirəm. Ola bilsin ki, Amerikanın əlində rəsmi Bakını narahat edən, rahatlığını əlindən alan bir sənəd, yaxud hansısa fakt var və bundan Azərbaycan iqtidarına qarşı istifadə etməyə hazırlaşır. Ona görə də qara məni basınca mən qaranı basım məntiqiylə davranaraq sanki qabaqlayıcı addımlar atılır. Təbii, mən iddia etmirəm ki, Amerikada qurd quzu ilə otlayır və iddia olunduğu kimi doğrudan da okeanın o tayında demokratiya ayaq tutub yeriyir. Amma axı gəlin insaflı olaq da. Amerikada və Avropada dövlətlər öz vətəndaşının rahatlığı üçün əsir, ona sahib çıxır və əlindən gələni əsirgəmir. Təsəvvür edin ki, Amerika əsgərini heç bir dövlətin mühakimə etmək ixtiyarı yoxdur. Hansı ölklədə cinayət törətməsindən asılı olmayaraq onu öz qanunları ilə mühakimə edə bilərlər.

-Müxalifətin bəzi qüvvələri hakimiyyətlə dialoq adlı bir polemikaya giriblər. Sabah sizi də hansısa statusla həmin görüşlərə dəvət etsələr ən azı fikir bildirmək üçün iştirak edərsinizmi?

-Suala cavab vermək üçün gərək icazə verəsiniz bir lətifə danışım. Bir gün iki gürcü “Alpinist”x9d filminə baxırlar. Baxırlar ki, alpinist nə qədər əlləşsə də dağa qalxa bilmədi. Film qurtarır və onlar bir kafeyə gedib içki içirlər. Gürcünün biri o biri ilə mərc gəlir ki, gəl gedək bir daha o filmə baxaq, alpinist bu dəfə o dağa qalxa biləcək. Durub gedirlər təkrar filmə baxırlar. Beləcə xəyalpərəst və sadəlöhv gürcü bicbala gürcüyə bir neçə dəfə qonaqlıq verməli olur. Bax bizim müxalifət də həmin qonaqlıq verən o gürcü kimidir. Bu cəfəngiyyat 20 ildir davam edir. Mən bunu dialoq adlandıranları qınayıram. Hakimiyyət ona müxalif olan tərəflə real dialoq istəyirsə, hər iki tərəfdən xalqın əksər hissəsini təmsil etmək haqqı olan yüksək səlahiyyət sahibləri iştirak etməli, səmərəli fikir mübadiləsi aparılmalı və onun real nəticələri olmalıdır. Amma bu gün orda tamam fərqli mənzərənin şahidi olmaqdayıq. Sanki hakimiyyət təmsilçisi onları bir zala yığıb mühazirə oxuyur. Bu cür danışıqlar millətə heç nə verə bilməz. Olsa-olsa beş-on adam deputat mandatı ilə mükafatlandırıla bilər.

-Yeri gəlmişkən, artıq məhkumluğunuzun müddəti başa çatıb və deputatlıq marafonuna qoşula bilərsiniz. Bu barədə götür-qoy etməmisiniz ki?

-Hələ qəti qərara gəlməmişəm. Bu gün üçün qənaətim qatılmamaqdır.

-Qatılası olsanız hansı dairəni gözaltı etmisiniz?

-Əgər qatılası olsam bu dəfə məhz elə Kəlbəcərdən qatılacam. Bilirsiniz niyə? Çünki kəlbəcərlilər Azərbaycanın 57 rayonuna səpələnib, xeyir-şərə çatdırıb gedə bilmirlər, talelərindən və vətənzislikdən sacdakı qovurğa kimi qovrulurlar. Bu gün ölüsünü basdırmağa yer tapmayan kəlbəcərlidir, dirisini həkimə apara bilməyən, evləndirib ərə verməyə imkanı olmayan, ailəsini dolandırmaq üçün min bir zillətə qatlaşan kəlbəcərlidir.

-Bu gün həm də torpağına gedib girov düşən də kəlbəcərlidir...

-Başqa rayonların insanları məndən inciməsin. Kəlbəcərlilər tamam başqa bir həyat yaşayırdılar. Onlara olan zülm kimsəyə olmadı. Təbii, başqa rayonlarımıza da divan tutdular, Xocalıdakı cinayət insanlıq yaşadıqca lənətlənəcək, amma artıq kəlbəcərlilər dayana bilmirlər. Sabah ola bilər ki, Dilqəm kimi aqibətini gözə almadan o torpaqda işgəncə ilə ölməyə belə getmək istəyənlərin sayı onlarla, yüzlərlə olacaq. Ona görə də belə bir qürurlu, vəfalı camaatın danışan dili, hayqıran səsi olmaqdan şərəfli heç nə olmaz mənim üçün dünyada. Yəni namizədliyimi versəm belə, o qutudan çıxmayacağımı da bilirəm. Amma heç olmasa gedib qapı-qapı insanlarımızı ziyarət etmək, onları dinləmək, təsəlli vermək, quru sözlə də olsa dərdinə şərik olmaq ellilərimin və özümün kəlbəcərsizliyimizi qismən də olsa unutdura bilərdi. Mən Azərbaycanı gəzirəm, yazda-yayda dağda-daşda çox oluram. Görəndə ki, bir kəlbəcərli bir bulağın üstündə 3-5 manata saz çalır, mənə çox pis təsir edir. Elə bil o dünyanı görüb qayıdıram onda.

-Deyəsən sizin pensiya məsələniz də hələ o dünyadan qayıtmayıb...

-(gülür) Bilirsiniz, heç özüm də maraqlanmadım. Deyirsiniz mənə də Rəhim Qazıyevə Müdafiə Nazirliyində dedikləri sözü desinlər? Rəhim 25 il ali məktəbdə dərs deyib, sonradan bir il nazir olub. İndi pensiya almaq üçün nazirlikdən arayış istəyir ki, mənə filan vaxtdan filan vaxtadək nazir işlədiyimlə bağlı sənəd verin. Deyirlər bizdə belə bir sənəd yoxdur, yəni demək istəyirlər ki, biz sənin nazir olduğunu nə eşitmişik, nə görmüşük. Bax mənə də bunu deyə bilərlər ki, sən nə vaxt daxili işlər naziri oldun ki, bizim xəbərimiz olmadı?

-Silahlı qüvvələrimizin mövcud durumundan az-çox xəbəriniz olmamış deyil...

-Zakir Həsənov müdafiə naziri təyin ediləndən sonra orduda xeyli dəyişiklik olduğu danılmazdır. Amma bu millət onda təkcə erməniyə deyil, dünyaya meydan oxuyardı ki, digər sahələrdə olduğu kimi heç olmasa orduda rüşvət və korrupsiya olmayaydı, orduya ayrılan son qəpik təyinatı üzrə xərclənəydi.

-İllər uzunu Səfər Əbiyevlə Nəcməddin Sadıqovun yola getməməsi üzündən ciddi problemlərin, ən azı ikihakimiyyətliliyin yaşandığı iddia olunub. Hətta bəzən Nəcməddin Sadıqovun məhz Həmidov qardaşlarının kadrı olduğu xüsusi vurğu ilə qeyd edilib...

-Nəcməddin Sadıqovla bağlı bir neçə dəfə mətbuata açıqlama vermişəm, ən çox da elə səninlə bu barədə danışmışıq. Amma təkrar deyirəm, o Azərbaycanda barmaqla sayılan hərbçilərdəndir ki, hərbi akademiya bitirib və onu da vaxtilə müdafiə etməyimiz də nəticəsiz olmadı. Qarabağ savaşındakı ən uğurlu əməliyyatlarımıza elə onun rəhbərliyi və komandanlığı ilə nail olundu. Tərtər və Goranboy istiqamətindəki əməliyatların hər ikisində briqada komandiri kimi Nəcməddin Sadıqov yaxşı tərəfdən özünü göstərə bildi və biz də ona görə mükafatlandırdıq. Amma bu hakimiyyət bu cür peşəkar kadrı alverçi elədi.

-Onun Azərbaycana nə vaxt gəlməsiylə bağlı sizdə məlumat varmı? Onun 88-ci ildə Ukraynadan batalyon komandirinin müavini kimi Gəncəyə Dağlıq Qarabağ münaqişəsini yatırtmaq üçün göndərilməsi iddiaları var.

-Onun dəqiq nə vaxt Azərbaycana gəlməsini bilmirəm. Mən Nəcməddini tanıyanda o artıq Goranboyda briqada komandiri idi. O vaxt da onun hərbi biliyinə valeh olmuşam. Mən o vaxt Prezident Aparatından Tərtər və Goranboya təhkim olunan xüsusu səlahiyyətli şəxs kimi Nəcməddinlə görüşəndə də dedim ki, mən sənin işinə qarışmayacam, döyüş aparmaq sənin işindir, bunun üçün məndən nə tələb olunursa de şərait yaradım, təmin və təchiz edim. Nəcməddin qorxaq adam da deyil, mən onunla mühasirəyə də düşmüşəm, onda da qorxmayıb, dik durub, savaşıb birlikdə mühasirəni də yarmışıq. Amma yenə deyirəm, belə bir hərbçi dönüb oldu alverçi. Hərbi bilik, hərbi savad qaldı qıraqda, alverə girişdi...

-Alverçi təzədən dönüb peşəkar hərbçi kimi savaşa bilərmi?

 -Ömür-billah savaşa bilməz.

-Yəni ikinci Qarabağ savaşı başlasa ondan əvvəlki qəhrəmanlığı gözləməyə dəyməz?

- Allah nəsib eləsin ikinci Qarabağ əməliyyatı başlasın, o qədər qəhrəman oğlanlar tapılacaq ki. Qəhrəman axtarmaq lazım deyil, dövləti idarə edənlər milləti, onun silahlı qüvvələrini qəhrəman etməlidir. O zaman heç kimin gözləmədiyi halda o millətin içindən nəinki Nəcməddin Sadıqov, hətta Cövhər Dudayev kimi qəhrəmanlar çıxır. Nə qədər ki, xalq və onun ordusu qəhrəmana çevrilməyib, heç bir ümummilli nailiyyətimiz olan deyil. Ordunu sındırıb içində qəhrəman axtarmazlar.

 -“Boz qurd”x9dların daxilində də bir qarmaqarışıqlıq var...

-Yaxşı ki, var. Mən hətta buna sevinirəm. Qurdlarla çaqqallar aralanmalıdır bir-birindən. Qədim türk misalı da var ki, qurdlar ulayanda itlər hürüşür. Yəni qurdlar ulamağa başlayanda itlər də hürərək özlərini ələ verirlər. Qurd heç vaxt quyruğun qısmaz, amma it hürsə belə həmişə quyruğunu qısır. Bozqurdların heç bir hakimiyyət idddiası yoxdur. Bizimki millətçilik davasıdır. Biz milli düşüncədə kimsəyə nəsə güzəştə getmək fikrimiz yoxdur.

 Zülfüqar Hüseynzadə