Rusiyanın Perm diyarında yerləşən “Azot” kimya zavodunda iki güclü partlayış baş verib.
Bizim.Media xəbər verir ki, bu barədə Perm diyarının qubernatoru Dmitri Maxonin məlumat verib.
Onun sözlərinə görə, hücum nəticəsində zavodda texnoloji prosesin qısamüddətli dayanması baş verib, lakin hazırda müəssisə normal rejimdə fəaliyyətini davam etdirir.
“Dəqiqləşdirilmiş məlumata əsasən, gecə saatlarında düşmən PUA-larının hücumu olub.
“Azot”da texnoloji prosesin qısamüddətli dayanması qeydə alınıb, hazırda zavod adi rejimdə işləyir. Ekoloji vəziyyət üçün təhlükə yoxdur, sakinlərin həyatına heç bir risk yaranmayıb.
Ərazidə operativ qərargah fəaliyyət göstərir”, – deyə Maxonin bildirib.
Qubernatorun sözlərinə görə, hücum nəticəsində iki mənzilli yaşayış evi zərər görüb, lakin xəsarət alan olmayıb.
Qeyd edək ki, “Azot” Rusiyanın ən böyük kimya zavodlarından biridir və “Uralchem”in törəmə şirkətidir. Zavod partlayıcı maddələr istehsal edir. “Azot” Ukraynadan 1700 km məsafədə yerləşir.
Bizim.Media
