Şvartsenegger keçirdiyi əməliyyatdan DANIŞDI: “Artıq “maşına” bənzəyirəm”

76 yaşlı Hollivud ulduzu Arnold Şvartseneggerin səhhəti ilə bağlı verdiyi açıqlama dünya mətbuatın gündəminə düşüb. 

Bizim.Media xəbər verir ki, aktyor cərrahi əməliyyat vasitəsi ilə ürəyinə kardiostimulyator quraşdırıldığını bildirib.

Bu barədə o, bodibildinqdən bəhs etdiyi “Arnold's Pump Club” “podkastına” müsahibəsində deyib. 

“Keçən bazar ertəsi əməliyyat olundum və bir az da “maşına” bənzədim. Ürəyimə kardiostimulyator yerləşdirildi”, - deyə “Terminator” filminin ulduzu vurğulayıb. 

Arnold ağır cərrahi müdaxilədən sonra özünü yaxşı hiss etdiyini və bir müddət gərgin fiziki məşqlərdən əl çəkməli olsa da, artıq əvvəlki həyatına qayıtdığını bildirib. 

Qeyd edək ki, bu, sayca Şvartseneggerin dördüncü ürək əməliyyatıdır. Aktyor, anadangəlmə ürək qüsuru ilə doğulub. 1997-ci ildə sənətçi aorta qapağının dəyişdirilməsi üçün ürək əməliyyatı keçirib, sonra isə ona daha iki oxşar cərrahi müdaxilə olunub. Aktyorun sonuncu əməliyyatı isə 2020-ci ildə olub. 

Rəşad Əliyev, Bizim.Media