“Ölkə iqtisadiyyatına Rusiya, Türkiyə, Orta Asiya ölkələrinin investorlarının marağı əhəmiyyətli dərəcədə artır”.
Bizim.Media xəbər verir ki, bunu Azərbaycan iqtisadiyyat naziri Mikayıl Cabbarov deyib.
O bildirib ki, Azərbaycan iqtisadiyyatı həm regional, həm də qlobal iqtisadiyyata inteqrasiya olunub:
“Biz investisiya mühitinin daimi yaxşılaşdırılması hədəfini qarşımıza məqsəd qoyuruq. Ərazilərimizin işğaldan azad edilməsindən sonra regionda yeni geoiqtisadi reallıq yaranıb. Azərbaycana əsasən Qərb, inkişaf etmiş ölkələr tərəfindən sərmayələr qoyulub. Lakin pandemiyanın gedişatı qloballaşmanı regionlaşma ilə əvəzlənmə meyillərini aydın şəkildə biruzə verir".
MÖVZU İLƏ BAĞLI:
“Ən sürətlə inflyasiya gedən sektor qida sahəsidir” - Nazir qiymət artımlarından danışdı
M.Cabbarovun sözlərinə görə, bu, digər tərəfdən Azərbaycanın bu bölgədə olan dəyərinin artımının aydın şəkildə siqnalıdır: "Bunun bir neçə səbəbləri var, birincisi, ölkədə mövcud olan makroiqtisadi sabitliyin mövcud olması, milli valyuta məzənnəsinin dayanıqlı olmasıdır. Ölkənin investisiya mühitinə marağın artması dövlət tərəfindən illərlə infrastruktura qoyulan yatırımların nəticəsidir.
Avropa Yenidənqurma və İnkişaf Bankının, Davos İqtisadi Forumun hesabatlarını nəzərdən keçirəndə görürürk ki, Azərbaycan nəinki üstün mövqeləri qoruyub saxlayır, biz hətta irəliləyirik.
Bu proses daimi olmalıdır, çünki rəqabət heç bir zaman dayanmayacaq",- deyə nazir vurğulayıb.
Qeyd edək ki, son 10 ildə Azərbaycan iqtisadiyyatına yatırılan birbaşa xarici investisiyaların həcmi 57 milyard ABŞ dolları olub.
Bizim.Media
