“Araz-Naxçıvan” 3-cü yeri və Konfrans Liqasını TƏMİN ETDİ

Bu gün Misli Premyer Liqasında 35-ci tur start götürüb.

Bizim.Media xəbər verir ki, ilk oyun günündə 3 matç keçirilib. Qarşılaşmaların hamısı eyni vaxtda start götürüb. Bu da 3 və 4-cü yerlərin sahiblərinin müəyyənləşməsi ilə bağlıdır.

“Araz-Naxçıvan” səfərdə “Şamaxı”nın qonağı olub. Matç qonaqların 1:0 hesablı qələbəsi ilə başa çatıb. Bununla da Naxçıvan klubu xal sayını 58-ə çatdıraraq üçüncü yeri və növbəti mövsümdə UEFA Konfrans Liqasında oynamağı təmin edib. "Şamaxı" isə 36 xalla 7-ci yerdədir.

“Sumqayıt” doğma divarlar arasında “Turan Tovuz”u sınağa çəkib. Vaqif Cavadovun istefaya göndərilməsindən sonra bu matça “Sumqayıt”ı Vurğun Hüseynov çıxarıb. Oyun qonaqların 1:0 hesablı qələbəsi ilə bitib. Tovuzlular bu qələbədən sonra xal saylarını 52-ə çatdıraraq dördüncü yeri təmin edib. "Sumqayıt" 30 xalla 9-cu yerdə qərarlaşıb.

Digər matçda isə artıq gümüş medalı təmin edən “Zirə” “Sabah”la üz-üzə gəlib. Görüş 1:1 hesablı heç-heçə ilə yekunlaşıb.

Beləliklə, "Zirə" xal sayını 71-ə çatdırıb. "Sabah" isə 45 xalla 5-ci yerdədir.

Qeyd edək ki, tura sabah keçiriləcək 2 matçla yekun vurulacaq.

17 may (şənbə)

17:00. "Sumqayıt" - "Turan Tovuz" - 0:1

Qol: Emmanuel Hakman, 30

Hakimlər: Tural Qurbanov, Asiman Əzizli, Müslüm Əliyev, Alik Yunusov

Mehdi Hüseynzadə adına Sumqayıt şəhər stadionu

17:00. "Zirə" - "Sabah" - 1:1

Qollar: Georgi Papunaşvili, 26 (1:0), Pavol Şafranko, 67 (1:1)

Hakimlər: Elçin Məsiyev, Elşad Abdullayev, Pərvin Talıbov, Vüqar Həsənli

Zirə İdman Kompleksinin stadionu

17:00. "Şamaxı" - "Araz-Naxçıvan" - 0:1

Qol: Felipe Santos, 44 (0:1)

Hakimlər: İnqilab Məmmədov, Namiq Hüseynov, Rahil Ramazanov, Kamranbəy Rəhimov

Şamaxı şəhər stadionu

18 may (bazar)

17:00. "Neftçi" - "Səbail"

19:00. "Qarabağ" - "Kəpəz"

Bizim.Media