Türkiyənin xarici işlər naziri Mövlud Çavuşoğlu şənbə günü həmkarları ilə NATO toplantısı üçün Berlinə gələrkən Finlandiya və İsveçi Kürdüstan İşçi Partiyası (PKK) və Xalq Müdafiə Birliklərini (YPG) dəstəklədiklərinə görə tənqid edib.
Bizim.Media xəbər verir ki, bu haqda informasiyanı Teletrader nəşri yayıb.
“Problem ondadır ki, bu iki ölkə açıq şəkildə PKK və YPG-yə dəstək verir. Bunlar hər gün əsgərlərimizə hücum edən terror təşkilatlarıdır. Türkiyə vətəndaşları məhz PKK və YPG-ni dəstəklədikləri üçün İsveç və Finlandiyanın ittifaqa qoşulmasına əngəl törətmək üçün ölkəyə təzyiq göstərirlər” deyə o, qeyd edib.
Xatırladaq ki, Türkiyə prezidenti Rəcəb Tayyib Ərdoğan cümə günü NATO üzvlərini və üzvlük üçün müraciət edən iki Skandinaviya ölkəsini təəccübləndirərək, Türkiyənin alyansın genişlənməsini dəstəkləyə bilməyəcəyini, çünki Finlandiya və İsveçin “bir çox terror təşkilatının vətəni” olduğunu demişdi.
İndi ABŞ və digər üzv ölkələr Ankaranın mövqeyini aydınlaşdırmağa çalışırlar.
İsveç və onun ən yaxın hərbi tərəfdaşı Finlandiya indiyədək 1949-cu ildə Soyuq Müharibədə Sovet İttifaqına qarşı yaradılan NATO-dan kənarda qalıb.
Hər iki ölkə böyük qonşuları Rusiya ilə müharibədən ehtiyatlanır, lakin onların təhlükəsizlik qorxuları Rusiyanın fevralın 24-də Ukraynanı işğal etməsindən sonra güclənib.
Bundan sonra Ərdoğanın mətbuat katibi İbrahim Kalın bildirib ki, Türkiyə İsveç və Finlandiyanın NATO-ya daxil olması üçün “qapını bağlamır”, lakin Skandinaviya ölkələri ilə danışıqlar aparılmasını və “xüsusilə Stokholmda terror fəaliyyətlərinin” məhdudlaşdırılmasını istəyir.
Bizim.Media
