Elm və təhsil naziri Emin Əmrullayev Qusardan olan iki ibtidai sinif müəlliminin arzusunu reallaşdırıb.
Bizim.Media internet portalının 31 avqust 2022-ci il tarixli sayında "60 bal toplayan qusarlı müəllimlər nazir Emin Əmrullayevdən nə xahiş etdilər" sərlövhəli yazıda sertifikasiya imtahanında 60 bal toplayan müəllimlərin arzusundan söz açmışdıq.
Qusar şəhər Bəhruz Ağaverdiyev adına 1 saylı orta məktəbin müəllimi Samirə Məmmədova və Urva kənd tam orta məktəbinin müəllimi Səidə Bağışova işlədikləri məktəblərdə tədris zamanı çox zəruri olan elektron lövhələrin verilməsini xahiş etmişdilər. Artıq nazir Əmrullayevin göndərdiyi 2 ədəd elektron lövhə Qusara çatıb.
Bu gün ağıllı lövhələr Qusar şəhər Bəhruz Ağaverdiyev adına 1 saylı orta məktəbə və Urva kənd məktəbinə təqdim ediləcək.
Aytəkin Alxaslı, Bizim.Media, Şimal bürosu
