Mülayim miqdarda çay və qəhvə istehlakının xroniki yuxusuzluğa səbəb olmadığı və yuxu müddətini azaltmadığı müəyyən edilib.
Bizim.Media xəbər verir ki, bu nəticəyə Bristol Universitetinin tədqiqatçıları gəliblər.
Araşdırmanın nəticələri Journal of Sleep Research jurnalında dərc olunub.
Uzun illərdir hesab olunurdu ki, kofein yuxuya mənfi təsir göstərir. Lakin əvvəlki araşdırmaların əksəriyyəti sorğulara əsaslandığından, nəticələr həyat tərzi ilə bağlı digər amillərin təsiri altında təhrif oluna bilərdi. Məsələn, qəhvə sevənlər daha çox stress keçirə, siqaret çəkə və ya daha az aktiv həyat tərzi sürə bilərlər. Bütün bunlar isə özlüyündə yuxunun keyfiyyətini pisləşdirə bilər.
Bu cür təhrifləri aradan qaldırmaq üçün alimlər mendel randomizasiyası metodundan istifadə ediblər. Bu üsul genetik məlumatlar əsasında vərdişlərin təsirini bioloji effektlərdən ayırmağa imkan verir. Tədqiqatçılar bir neçə iri biobankdan yüz minlərlə insanın genetik məlumatını araşdıraraq kofein qəbulu və onun metabolizm sürəti ilə bağlı genləri müəyyən ediblər.
Təhlil göstərib ki, kofeini daha çox qəbul etməyə genetik meyilli olan insanlarda gündüz yuxululuğu daha az müşahidə olunur və onlar gün ərzində demək olar ki, yatmırlar. Bununla yanaşı, onlarda yuxusuzluq riski artmır və gecə yuxusunun müddəti də azalmır.
Oxşar mənzərə kofeini daha sürətlə metabolizə edən insanlarda da qeydə alınıb.
Alimlərin fikrincə, belə hallarda kofein orqanizmdən daha tez xaric olur və yuxuya getmənin təbii prosesinə mane olmur.
Araşdırma həmçinin göstərib ki, yuxu problemlərinin qəhvə ilə əlaqələndirilməsi daha çox həyat tərzi amilləri ilə bağlıdır, nəinki birbaşa kofeinin özü ilə.
Bizim.Media
