Yaponiyada aparılan yeni araşdırma qanda şəkərin səviyyəsinə nəzarəti yaxşılaşdırmağa kömək edə biləcək sadə içkini üzə çıxarıb. Alimlərin qənaətinə görə, yaşıl çay katexinləri və inulin adlı qida lifini birləşdirən içki orqanizmdə qlükozanın tənzimlənməsinə müsbət təsir göstərə bilər.
Bizim.Media xəbər verir ki, nəticələr "Nutrients" jurnalında dərc olunub.
Araşdırmada visseral piylənməsi olan 96 nəfər yetkin iştirak edib. Bu vəziyyətdə piy daxili orqanların ətrafında toplanır və bu da metabolik pozuntular, o cümlədən Şəkərli diabet riskini artırır.
İştirakçılar 12 həftə ərzində hər gün suda həll olunan toz içki qəbul ediblər. İçkinin tərkibində 400 milliqram yaşıl çay katexinləri və 2,3 qram inulin olub. Digər qrup isə plasebo qəbul edib.
Təhlil göstərib ki, aktiv maddələr olan içkini qəbul edən şəxslərdə insulinə həssaslıq yaxşılaşıb. Bu isə o deməkdir ki, hüceyrələr hormonun təsirinə daha yaxşı reaksiya verir və qlükozanı qandan daha effektiv mənimsəyir. Nəticədə qanda şəkərin səviyyəsini normal saxlamaq asanlaşır.
Araşdırma müddətində iştirakçıların visseral piy miqdarında ciddi dəyişiklik qeydə alınmayıb.
Lakin əlavə analiz maraqlı nəticə ortaya qoyub. Metabolizmdə yaxşılaşma bağırsaq mikroflorasındakı dəyişikliklərlə əlaqəli ola bilər.
Xüsusilə insulinə həssaslığın daha çox artdığı iştirakçılarda Coprococcus cinsinə aid bakteriyaların sayında yüksəliş müşahidə edilib. Bu bakteriyalar orqanizm üçün faydalı qısa zəncirli yağ turşularının yaranmasında iştirak edir.
Alimlər bildirir ki, nəticələr ümidverici olsa da, hələ yekun hesab edilə bilməz. Effektin dəqiq təsdiqi və mexanizmlərin daha yaxşı anlaşılması üçün daha geniş və uzunmüddətli araşdırmalar aparılmalıdır. (Demokrat.az)
Bizim.Media
