Evdən işləmək artıq yalnız pandemiya tendensiyası deyil. Bu, artıq milyonlarla insan üçün reallıqdır. Bəziləri ofis görüşlərini evdə yemək bişirməklə birləşdirir, digərləri isə ofis sahəsindən tamamilə imtina ediblər.
Bizim.Media xəbər verir ki, bu barədə “The Washington Post” qəzeti araşdırma aparıb.
Araşdırma nəticəsində məlum olub ki, yaşlı işçilər və əlilliyi olan insanlar, evdən işləməyə daha çox meyillidirlər.
Onlayn iş qismən orta yaşlılar üçün də maraqlıdır. Tam uzaqdan iş isə təqaüd yaşına çatanlar arasında daha çox populyardır. Onların çoxu yarımştat işləməyə və ya öz bizneslərini idarə etməyə daha maraqlıdırlar.
Tamamilə uzaqdan işləyənlər arasında ən yüksək faiz 65 yaşdan yuxarı olanlardır. 20, 30 yaşlarında olan gənc işçilər, xüsusən də İT və müştəri xidmətləri sahəsində hibrid modelləri seçməyə daha çox meyllidirlər.
İT və proqram tərtibatçıları ilə yanaşı sistem analitikləri, media nümayəndələri, yazıçılar, redaktorlar, texniki müəlliflər məsafədən işləməyə üstünlük verirlər.
Maliyyə və biznes təhlilçiləri, sığorta anderrayterləri, orta və yüksək səviyyəli menecer üçün məsafədən iş daha cəlbedicidir.
Evdən işləməyin mümkün olmadığı peşələrsə istehsal, tikinti, nəqliyyat, təhlükəsizlik və xidmət sektorudur. Nəzərə alaq ki, müasir texnologiya və çevik iş tənzimləmələri həqiqətən də inklüziv əmək bazarının yaradılmasına kömək edir.
Araşdırma göstərir ki, bu gün məsafədən işləmək sadəcə bir trend deyil, karyera planlaşdırması üçün güclü bir vasitədir.
Bu, ən çox yaşlı işçilərə, əlilliyi olan və yüksək ixtisaslı insanlara fayda verir. Lakin, dərəcə və ya texniki təhsil olmadan belə, mühasibat uçotu, müştəri dəstəyi və ya öz biznesinizi idarə etmək sahələrində məsafədən işləmək imkanları mövcuddur.
Surxay Atakişiyev, Bizim.Media
