Bu şəxslər ödənişsiz tibbi və psixoloji yardım ALA BİLƏCƏK

Minatəmizləmə zamanı zərərçəkmiş şəxslər tibb müəssisələrində dövlət büdcəsi vəsaiti hesabına tibbi yardım ala biləcəklər.

Bizim.Media xəbər verir ki, bu məsələ Milli Məclisin bugünkü plenar iclasında "Minatəmizləmə fəaliyyəti haqqında” Azərbaycan Respublikasının 2024-cü il 13 dekabr tarixli 90-VIIQ nömrəli Qanununun icrası ilə əlaqədar bəzi qanunlarda ("Əhalinin sağlamlığının qorunması haqqında") dəyişiklikdə öz əksini tapıb.

Layihəyə əsasən, "Minatəmizləmə fəaliyyəti haqqında” Azərbaycan Respublikasının Qanununa uyğun olaraq zərərçəkmişlər dövlət səhiyyə sisteminin müəssisələrində ixtisaslaşdırılmış tibbi yardımla dövlət büdcəsinin vəsaiti hesabına (“Tibbi sığorta haqqında” Azərbaycan Respublikasının Qanununa uyğun olaraq xidmətlər zərfində nəzərdə tutulduğu halda isə icbari tibbi sığorta vəsaitləri hesabına) təmin olunacaqlar.

Bundan əlavə, minatəmizləmə zamanı zərərçəkənlər ödənişsiz psixoloji yardım alacaqlar.

Qanun layihəsinə əsasən, "Minatəmizləmə fəaliyyəti haqqında” Azərbaycan Respublikasının Qanununa uyğun olaraq zərərçəkmişlərin ödənişsiz psixoloji yardım almaq hüququ vardır.

Qanun layihəsi səsə qoyularaq bir oxunuşda qəbul edilib.

Günay Şahmar, Bizim.Media