“Günəşli yaylasından Zığa tərəf uzanan yamac boyu tikintilərin qarşısı alınmalıdır. Çünki yamac kəsiləndə, süxurların dayanıqlılığı itir və sürüşmə prosesləri aktivləşir”.
Bizim.Media xəbər verir ki, bunu Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev deyib.
MÖVZU İLƏ BAĞLI:
''Azərbaycanın su ehtiyatları azalır'' - ETSN
Qurum rəsmisi Trend-ə açıqlamasında Zığın köhnə sürüşmə zonası olduğunu, mövsümdən asılı olaraq yağışlar artan kimi orada proseslərin aktivləşdiyini bildirib.
Ə.Əliyev qeyd edib ki, Suraxanı Rayon İcra Hakimiyyətinin məktubu əsasında Nazirlər Kabinetinin göstərişi ilə orada müvafiq araşdırmalar aparılıb və rəy verilib. Amma müəyyən çatlar var və mövsümlə əlaqədar dinamik dəyişikliklər baş verir.
“Evlərdə əvvəlcədən çatlar var idi. Davamlı olaraq bizə hər ay 3-4 şikayət məktubu gəlir. Biz də həmin şikayətləri araşdırırıq. Orda müəyyən bərkidilmə işləri görülüb və görülməkdə də davam edir. Tikinti işlərinin aparılmasına görə rəyi biz vermirik. Bu, bizim səlahiyyətimizə aid məsələ deyil. Sadəcə həmin ərazinin sürüşmə zonası olub-olmamasını müəyyənləşdiririk. Hətta Nazirlər Kabinetinə ünvanladığımız sonuncu məktubda görülməli olan tədbirlər siyahısında ilk növbədə qeyd etmişik ki, burada yamac kəsilmələrinin qarşısı birmənalı olaraq dayandırılmalıdır. Bu haqda dəfələrlə Suraxanı Rayon İcra Hakimiyyəti də məlumatlandırılıb.
Günəşli yaylasından Zığa tərəf uzanan yamac boyu tikintilərin qarşısı alınmalıdır. Çünki yamac kəsiləndə, süxurların dayanıqlılığı itir və sürüşmə prosesləri aktivləşir.
Həmçinin sürüşmənin qarşısının alınması üçün kanalizasiya şəbəkələrindən su axını dayandırılmalı, drenaj yolu ilə yeraltı və texnogen sular toplanılmalıdır. Lakin işlərin icrası nazirliyin səlahiyyətində deyil. Davamlı olaraq görülməli tədbirlər barədə müvafiq qurumlar məlumatlandırılır”, - xidmət rəhbəri bildirib.
Bizim.Media
