Bu gündən Göygöl rayonunda “II Moruq Festivalı” öz işinə başlayıb.
Bizim.Media-nın yerli bürosu xəbər verir ki, rayonunun Keşkü kəndində baş tutan festival Kənd Təsərrüfatı Nazirliyinin dəstəyi ilə keçirilir və təşkilində məqsəd bölgənin turizm sektoru üzrə rəqabət qabiliyyətini yüksəltmək, aqroturizmin inkişafına dəstək vermək, Göygöl rayonunun təbiətinin unikal cəhətlərini, burada istehsal olunan kənd təsərrüfatı məhsullarını tanıtmaq, moruq istehsalının təşviqi yolu ilə iqtisadiyyatın inkişafına töhfə verməkdir.
Tədbirdə ziyarətçilərə moruq istehsalı ilə daha yaxından tanış olmaq imkanı yaradılır, yerli istehsalçılar tərəfindən təqdim olunan moruq növlərinin dequstasiyası və satışı təşkil olunur.
Festivala gələn ziyarətçilər bəyəndikləri məhsulları ən sərfəli qiymətə almaq imkanı qazanırlar.
3 gün davam edəcək festivalda ziyarətçilər kənd təsərrüfatı məhsullarının sərgi-satış yarmarkasına, moruq təsərrüfatı guşəsinə baş çəkə biləcək, müxtəlif dequstasiya tədbirlərində iştirak edəcək, ustad dərslərini, o cümlədən moruqla rəsm çəkməyə dair ustad dərsini izləyə biləcəklər.
Festival çərçivəsində həmçinin sənətkarların hazırladıqları əl işlərinin sərgi-satış yarmarkası təşkil edilir. Ziyarətçilər açıq havada konsert proqramı, idmançıların nümunəvi çıxışlarını da izləyəcəklər.
Qeyd edək ki, Moruq Festivalının Göygöl rayonunda keçirilməsi təsadüfi deyil. Göygöl rayonu ən çox giləmeyvə, o cümlədən moruq becərilən rayonlardan biridir.
Məqsəd Rəhimov, Bizim.Media, Qərb Bürosu
