Xocalıya köçən 33 ailəyə mənzillərinin açarları VERİLDİ – FOTO

Aprelin 28-də doğma yurduna yola salınan köç karvanı Xocalı şəhərinə çatıb. 

Bizim.Media-nın yerli bürosu xəbər verir ki, bu mərhələdə Xocalı şəhərinə köçürülən 33 ailədən ibarət 137 nəfərə mənzillərin açarları təqdim edilib. Mərasimdə Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri iştirak ediblər.

Xocalı şəhərində  daimi yaşayış üçün köçürülən ailələrə yeni tikilmiş fərdi yaşayış evlərində mənzillər verilib. 

Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 mindən çox insan yaşayır.










Elgün Gəncimsoy, Bizim.Media, Qarabağ bürosu