Zaqataladakı bıçaqlanmanın TƏFƏRRÜATI

Zaqatalada baş verən bıçaqlanmanın bəzi tərərrüatları məlum olub.

Bizim.Media-nın yerli bürosu xəbər verir ki, gecə saatlarında rayonun Faldar kəndində məclisdə iştirak edən gənclər arasında mübahisə düşüb, sonradan davaya çevrilib.

Zaqatala rayon Mərkəzi Xəstəxanasından bildirilib ki, dava zamanı Tural Səfərov sol budundan kəsilmiş açıq yara alıb. Zərərçəkən şəxs xəstəxananın cərrahiyyə korpusunda əməliyyat olunduqdan sonra reanimasiya şöbəsinə yerləşdirilib. Müalicəsi davam etdirilir.

Baş vermiş hadisə ilə bağlı Daxili İşlər Nazirliyinin Mətbuat Xidmətinin Şəki regional qrupundan bildirilib ki, dekabrın 21-i gecə saat 01 radələrində Zaqatala rayonunun Faldarlı kəndi ərazisində 2002-ci il təvəllüdlü Vasif Kərimov aralarında yaranmış mübahisə zəminində həmkəndliləri 1999-cu il təvəllüdlü Tural Səfərov və Emin Rüstəmova bıçaqla xəsarət yetirib.

Polis əməkdaşlarının keçirdikləri tədbirlərlə əməli törətməkdə şübhəli bilinən V.Kərimov saxlanılıb. Müvafiq ekspertiza təyin olunub, araşdırmalar davam etdirilir.

Tural Rasimoğlu, Bizim.Media, Şimal-Qərb bürosu