Məhkum yoldaşını öldürən şəxs MƏHKƏMƏ QARŞISINDA

Cəzaçəkmə müəssisəsində öz məhkum yoldaşını öldürməyə cəhddə təqsirləndirilən Azər Şalıyevin məhkəməsi başlayıb.

Bizim.Media xəbər verir ki, proses Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilib.

Məhkəmə istintaqın yekunlaşdığını bəyan edib və çıxışlar mərhələsinə keçilib.

Məhkəmədə Dövlət ittihamçısı çıxış edərək Azər Şalıyevin 16 il azadlıqdan məhrum edilməsini istəyib.

Azər Şalıyevin vəkili çıxış üçün vaxt istəyib.

Bu səbəbə görə, iclas 2 oktyabr tarixinə təxirə salınıb.

Qeyd edək ki, hər iki şəxs eyni cəzaçəkmə müəssisəsində məhkumluq həyatı yaşayıb. Azər Şalıyev aralarında yaranan mübahisə zamanı Şəhriyar Baxışəliyevin boğazına ağır xəsarət yetirib.

Azər Şalıyevə qarşı Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə və qəsdən adam öldürməyə cəhd) maddəsi ilə ittiham irəli sürülüb.

Məlumat üçün bildirək ki, hər iki şəxs ölüm işi ilə məhkumluq həyatı yaşayırdı. Belə ki, təqsirləndirilən şəxs Azər Şalıyevin cəzasının bitməsinə 1 il 7 ay, zərərçəkmiş şəxs Şəhriyar Baxışəliyevin isə 3 ilə yaxın qalıb.

Selcan Zaurqızı, Bizim.Media