Qızmar havalarda isti içkilər SƏRİNLƏDİRMİ? – ARAŞDIRMA

İsti havalarda tez-tez maye qəbul etmək tövsiyyə olunur. Çox insan sərinləmək üçün soyuq su içir. Amma isti içkilərin də sərinlədə biləcəyi iddia olunur. Xüsusən də Azərbaycanda insanların sevimli içkisi olan çay yay aylarında da vazkeçilməzdir.

Bəs isti içkilərin sərinlətməsi nə dərəcədə realdır?

Kanadanın Ottava Universitetində aparılan araşdırmalar göstərir ki, isti içkilər sərinləmək üçün yaxşı vasitə ola bilər.

"İsti içki içdiyiniz zaman bədəninizdə saxlanılan istilik miqdarı azala bilər, çünki isti içkidən yaranan tər buxarlana bilər. Lakin bu üsul yalnız tərin buxarlana biləcəyi mühitdə təsirli olur. Rütubətli bir mühitdəsinizsə və ya uzunqol paltar geyinirsinizsə, bu üsul işləməyə bilər. Çox isti və rütubətli bir gündə qalın paltar geyinirsinizsə və tərləyirsinizsə isti içkilər içmək mənfi təsir göstərə bilər. Belə bir vəziyyətdə isti içki bədənə əlavə istilik verə bilər, ona görə də tərləmə buxarlanmağa kömək etmirsə, soyuq içki qəbul etməyiniz məsləhətlidir”.

Buzlu içki qədər olmasa da...

Ottava Universitetinin tədqiqatçısı Ollie Jay bildirib ki, isti içkinin sərinlətməsi mümkündür.

“İsti içki içmək, bədənin əsas temperaturunu çox yüksəltməsə də, tərləmə reaksiyasını tətikləyir. Tər dərinin səthində soyuyur, həddindən artıq istilik hissini azaldır. "Beləliklə, isti içki, xüsusən də tərləmədiyiniz zaman sizi sərinlədə bilər, lakin buzlu içkinin ani soyuducu təsirini təmin etməyə bilər".

Nuray, Bizim.Media