Bildiyimiz kimi, ali məktəblərə ixtisas seçimi davam edir. Abituriyentlər ballarına uyğun olaraq istədikləri ixtisasları sıralayırlar.
Seçim zamanı əyani təhsillə yanaşı, qiyabi təhsili seçənlər də az deyil. Həmçinin, məlumat verdiyimiz kimi, bu ildən 15-ə yaxın universitetdə bəzi qiyabi ixtisaslara tələbə qəbulu aparılmayacaq.
MÖVZU İLƏ BAĞLI:
Bu il bəzi qiyabi ixtisaslara tələbə qəbulu aparılmayacaq - VİDEO
Qeyd edək ki, əyani təhsildə tələbə müntəzəm olaraq dərslərdə və imtahanlarda iştirak etsə də, qiyabi təhsildə hər tədris müddəti bir aydır və tələbə ildə 2 dəfə imtahan verir. Bundan əlavə, qiyabi təhsilin müddəti 5 il olur.
Maraqlıdır ki, tələbələr niyə qiyabi təhsilə üz tuturlar?
Bakı Dövlət Universitetinin Jurnalistika fakültəsində qiyabi təhsil alan Hülya Abdullayeva Bizim.Media-ya açıqlamasında bildirir ki, qiyabi təhsili həm işləyib, həm də oxumaq üçün seçib və peşman deyil.
“Qiyabi təhsilin müsbət cəhəti budur ki, həm özümə, həm işimə, həm də təhsilimə rahat vaxt ayırıram.
Dərslərin yüklənməsi isə qiyabi təhsilin mənfi cəhətidir. Yəni, əyanidə oxuyanların bir semestrda öyrəndiyi dərsi biz 2 həftədə öyrənməyə çalışırıq. Bu da kollekviumlar, sərbəst işlər və s. üçün çox az müddətdir”.
Müsahibimiz tələbə namizədlərinə qiyabi formada təhsil almağı məsləhət görüb. O, sonda bildirib ki, qiyabi oxusa da, universitetin imkanlarından kifayət qədər yararlanır.
Məsələylə bağlı təhsil eksperti Qoşqar Məhərrəmov isə düşünür ki, qiyabi təhsilin forması çoxdan dəyişməli idi, çünki bu təhsil forması müasir tendensiyalara uyğun deyil:
“Buna görə də hesab edirəm ki, yaxın zamanda qiyabi fakültələrin çoxu bağlanacaq və tələbələrə hibrid formada təhsil təklif ediləcək.
Qiyabi təhsilin müsbət cəhətləri müəyyən qədər ucuz olması, işləyən, ailə məsələləri olan və yaxud oxuduğu şəhərdə yaşamağı çətin olan insanlar üçün əlverişli olmasıdır. Mənfi cəhəti isə tədris müddətinin çox az olması, tələbənin ixtisasıyla bağlı praktiki və nəzəri bilikləri tam qavraya bilməməsidir. Çünki qısa müddətdə böyük məzmunu, mövzunu mənimsəmək çox çətin olur və bununla bağlı boşluqlar yaranır. Yəni, tələbə qiyabi təhsilin diplomunu alsa belə, onun tələb etdiyi biliklərə yiyələnə bilmir”.
Dərslərə yalnız müəyyən vaxtlarda gəlmək tələbənin təhsilinə təsir edir?
“Əlbəttə, bu, tələbərə təsir edir. Çünki onlar üniversitet ortamında da az iştirak edirlər, ancaq əyani təhsildə tələbələrin sosiallaşması, universitetin tədbirlərində iştirak etməsi daha mümkündür. Bu isə onların çoxtərəfli inkişafına səbəb olur”.
Qiyabi təhsili seçmək istəyən abituriyentlərə məsləhətləriniz nələrdir?
“Məsləhət görürəm ki, mümkün qədər əyani təhsil almağa çalışsınlar. Düzdür, müxtəlif səbəblərə görə 17-18 yaşda yox, 25-26 yaşda işədikləri, ailəli olduqları üçün qiyabi təhsil ala bilərlər, ancaq yenə də bilməlidirlər ki, qiyabi təhsil aldıqları zaman internetdən və ya müxtəlif resurslardan məlumatlar öyrənərək özlərini inkişaf etdirməlidirlər. Əks halda, aldıqları diplomun onlara faydası çox olmayacaq. Çünki təkcə universitetlərin verdiyi bilik 5 il sonrakı bazarın tələblərinə cavab verməyə bilər”.
Nəzrin Mirzəyeva, Bizim.Media
