III Türk Dünyası Ədəbiyyat və Kitab Festivalının açılış mərasimində tanınmış yazar, publisist Babək Göyüşün də imza saatı keçirilib.
Festival çərçivəsində Bizim.Media-nın masasında yazarın "Yaşıl qurbağanın çəhrayı daşı” adlı hekayələr və publisistik yazılarından ibarət "Ədəbiyyat cəbhəsində sakitlikdir" kitabları sərgilənib.
MÖVZU İLƏ BAĞLI:
Əməkdar jurnalistin imza günü keçirildi – FOTO
Babək Göyüşün əsərləri festival iştirakçılarının böyük marağına səbəb olub.
Festivalla bağlı fikirlərini bölüşən yazar bu cür tədbirlərin ədəbiyyatın təbliği üçün mühüm önəmə malik olduğunu bildirib.
Qeyd edək ki, Babək Göyüşün ilk hekayəsi 1988-ci ildə "Ədəbiyyat qəzeti"ndə çap olunub. Daha sonra onun hekayələri "Azərbaycan", "Ulduz" və "Azərbaycan təbiəti" jurnallarında, "Yol" qəzetində və digər mətbu orqanlarda işıq üzü görüb.
Yazıçının "Ağ geyimli qadın" hekayələr kitabı 2008-ci ilin noyabrında çap olunub. Kitabda yazıçının 1989-cu ilədək qələmə aldığı 11 hekayə toplanıb. Babək Göyüşün publisistik yazılarından ibarət "Ədəbiyyat cəbhəsində sakitlikdir" adlı ikinci kitabı 2015-ci ildə "Ol" nəşrləri evində dərc olunub. 204 səhifəlik "Yarımçıq ömür" (həyat hekayəti) kitabı Bakıda 2021-ci ildə "Pergament" nəşriyyatında çapdan çıxıb. 2022-ci ilin sentyabr ayında isə "Yaşıl qurbağanın çəhrayı daşı" (180 səh.) hekayələr kitabı dərc olunub.
Babək Göyüş 2004-cü ildən 2013-cü ilədək Azərbaycan Yazıçılar Birliyinin üzvü olub.
Qeyd edək ki, Bizim.Media informasiya portalının informasiya dəstəyi ilə keçirilən festivalın təşkilatçıları Azərbaycan Respublikası Mədəniyyət Nazirliyi, Azərbaycan Yazıçılar Birliyi, Milli Məclisin Mədəniyyət Komitəsi, Bakı şəhər İcra Hakimiyyəti, Beynəlxalq Türk Mədəniyyəti və İrsi Fondu, Beynəlxalq Türk Akademiyası, TÜRKSOY, TİKA, YTB, AMEA, ASAN Könüllülər Təşkilatı, İLESAM, Badam klinikası, Dünya Gənc Türk Yazarlar Birliyi, Fileur Global Security Group və Mədəniyyət kanalıdır.
AMEA-nın parkında (Hüseyn Cavid prospekti) səkkiz gün davam edəcək festivalın hər günü bir ölkəyə – Azərbaycan, Qırğızıstan, Özbəkistan, Macarıstan, Qazaxıstan, Türkiyə, Türkmənistan və Şimali Kipr Türk Cümhuriyyətinə həsr olunacaq.
Bizim.Media
