“Tərtər rayonunun Dəmirçilər kəndini sel sularından azad etməklə yanaşı, yarana biləcək daha böyük ziyanın qarşısını almağa çalışırıq”.
Bu fikirləri Bizim.Media-nın Qarabağ bürosuna Meliorasiya və Su Təsərrüfatı Açıq Səhmdar Cəmiyyətinin sözcüsü Dilqəm Şərifov deyib.
O, bildirib ki, respublikanın bir çox rayonlarına dolu və leysan yağsa da ən ciddi fəsad Tərtərdə qeydə alınıb:
"Qeyri- sabit hava şəraiti ölkənin bir çox rayonunda hökm sürür. Leysan yağışın yağması, dolunun düşməsi nəticəsində əhaliyə ciddi ziyan dəyib. Şəki rayonuna dolu yağsa da, təsərrüfata ziyan dəyməyib. Goranboy və Tərtər rayonlarına isə sel gəlib. Goranboy rayonunda sel sularının gəlməsi yollara və avtomobillərə ziyan vurub. Tərtərdə isə daha böyük fəsadlar törədib. Rayonun Dəmirçilər kəndində fərdi evlərə və təssərrüfat sahələri su altında qalıb. Hazırda Meliorasiya və Su Təsərrüfatı Açıq Səhmdar Cəmiyyətinin yerli istismar idarələrinin texnikaları kəndin sel sularından azad olması üçün ciddi iş rejimində çalışır. Sel sularının qarşısı alınır, bəzi yerlərdə məcrası dəyişdirilərək sel arxlara yönləndirilir. Hazırda əhaliyə dəyən ziyanın miqdarı bərədə heç nə deyə bilmərəm. Çünki hazırkı vəziyyətdə sel sularının qarşısını almaq istiqamətində işlər görülür. Daha böyük sel sularının gəlmə ehtimalını düşünərək, işçi qrupu bəndlər qurur”.
Elgün Gəncimsoy, Bizim.Media, Qarabağ bürosu
