Şəkidə əlverişsiz hava DƏHŞƏTLİ QƏZAYA səbəb oldu – 2 azyaşlı öldü, 6 yaralı var 

Axşam saatlarında Yevlax-Zaqatala-Gürcüstan sərhədi magistral yolunun Şəki rayonunun Cəfərabad kəndi ərazisindən keçən hissəsində baş verən qəza nəticəsində iki azyaşlı hadisə yerində ölüb, daha altı nəfər müxtəlif bədən xəsarəti alıb.  

Bizim.Media-nın yerli bürosu xəbər verir ki, rayonun Çayqaraqoyunlu kənd sakini Elçin Məmmədovun idarə etdiyi "VAZ-21011" markalı avtomobillə hərəkətdə olarkən yolun hədsiz çiskin-duman olması səbəbindən qarşısına çıxan inəyi görmədiyindən vurub.  

Nəticədə avtomobil idarəetmədən çıxaraq yol kənarındakı çökəkliyə aşıb. Qəzadan sonra avtomobildə olan iki azyaşlı - 3-cü sinif şagirdi 9 yaşlı Çiçək Əhmədova və məktəbəqədər hazırlıq qrupuna gedən 6 yaşlı Elşad Həşimov hadisə yerindəcə keçinib.  
Həmçinin avtomobildə olan daha 6 nəfər Şəki rayon mərkəzi xəstəxanasına yerləşdirilib.  
Xəstəxanadan Bizim.Media-ya bildirilib ki, yaralılardan bir nəfər qadının vəziyyəti hadisə zamanı çoxlu qan itirdiyindən ağır olaraq qalır. Digər yaralılara ilkin tibbi yardım göstərilir, vəziyyətləri qismən sabitləşib.  

Faktla bağlı araşdırma aparılır.  

Tural Rasim oğlu, Bizim.Media, Şimal-Qərb bürosu