“Pensiya yaşı ilə bağlı müəyyən rəqəmlər səslənmişdi. 65 yaşına çatan insanlar arasında 60 % pensiya alan var, 40 % sosial müavinət alır”.
Bizim.Media xəbər verir ki, bunu Milli Məclisin bu gün keçirilən iclasında əmək və əhalinin sosial müdafiəsi naziri Sahil Babayev deyib.
Nazir bildirib ki, sığorta əsaslı pensiya sisteminə malik olmaq üçün addımlar atılır:
“Sosial sığorta ödənişi həyata keçirmiş insanların hər biri pensiya çətiri ilə əhatə olunub. Sosial sığorta ödəməyənlərə eyni yanaşmanı tətbiq edə bilmərik. Fərdi uçot sistemində 2006-cı ildən sonra sosial sığortaya görə amnistiya tətbiq edilib. Bu, çox böyük humanist addımdır. Sığortanı vaxtlı-vaxtında ödəyən şəxslər var, onlar fərqləndirilməlidir.
Sosial sığorta ödəməyən şəxslərə sosial müavinət verilir. Bir daha vurğulamaq istəyirəm ki, ömür uzunluğu ilə bağlı rəqəmlər səsləndirilir. Beynəlxalq təcrübədə pensiya dövrü 12 il olaraq hesablanır. Bu, sosial sığorta sistemidir. Bu gün bizdə pensiyaya çıxanların 68%-i 12 ildən çox pensiya alır. Bu gün bizdə pensiya yaşı 65 olsa da, edilmiş güzəştlər nəticəsində pensiya alanların orta yaşı 60-61-dir”.
“Bundan əlavə, ömür boyu qeyri formal çalışıb Sosial Müdafiə Fonduna müvafiq ödənişləri etməmiş şəxslər var. Biz onları, daim formal çalışıb dövlətə lazımi vəsaiti vermiş şəxslərlə eyniləşdirə bilmərik. Əgər biz belə etsək, sosial sığorta sistemini dağıdaraq”, - deyə nazir əlavə edib.
Murad Əhmədov, Bizim.Media
