Rəşad Dağlı işi barədə yeni xəbər – VİDEO

Rəşad Dağlının azyaşlı oğlunun adına saxta sosial şəbəkə hesabı açılıb. Hələ bu azmış kimi, həmin profil vasitəsi ilə guya meyxanaçıya dəstək adı ilə pul yığılır.

Bizim.Media xəbər verir ki, bu barədə XəzərTV süjet yayımlayıb. Məlumatda qeyd edilib ki, bir necə gündür tik-tok sosial şəbəkəsində Rəşad Əmirovun oğlu Yusif Əmirovun adına "atama dəstək olun" adlı saxta profil açılıb. 

Hətta profildə Rəşad Dağlı ilə bağlı yazılar, videolar paylaşılıb. Saxta hesabın Rəşad Dağlının oğlu ilə əlaqəsi olmadığı, dələduzluq məqsədilə yaradıldığı bildirilib.

Rəşad Əmirovun Dostu Ataş Hüseynin sözlərinə görə, belə bir vaxtda bu addımın kim və ya kimlərsə tərəfindən atılması sadəcə olaraq Rəşadın ailəsinə böyük zərbədir.

Ataş Hüseyn bildirib ki, Yusifin bir dənə sosial şəbəkə profili var və onun adına açılan başqa profillərdən ailə bixəbərdir.

Rəşad Dağlının vəkili Elvin Əliyevlə də əlaqə saxladıq. O da açıqlamasında bildirib ki, Rəşad Dağlı və ailəsinin sözügedən yardımlarla heç bir əlaqəsi yoxdur.

"Rəşadla əlaqə saxlayıb bu barədə danışmışam. Onun və ailəsinin yığılan pullarla bağlı heç bir məlumatı yoxdur, onlar belə bir təşəbbüs göstərməyiblər. Rəşad onu sevənlərə və həssaslıq göstərənlərə təşəkkür edir. Lakin belə bir yardıma ehtiyac yoxdur. Bu pullar qanunsuz şəkildə yığılır. Xahiş edirəm ki, vətəndaşlar belə hallara aldanmasınlar", - deyə Elvin Əliyev qeyd edib.

Daxili İşlər Nazirliyinin əməkdaşı Nurlan Əliyev isə məsələ ilə bağlı bildirib ki, bununla bağlı araşdırma başlanılıb.

Qeyd edək ki, tanınmış meyxanaçı Rəşad Dağlı qonşusu İskəndər Mehtiyevi qətlə yetirməkdə təqsirləndirilir.

Bizim.Media