Balakəndə su var, amma sakinlər istifadə edə bilmirlər - VİDEO

Yaxınlıqda artezian quyusu var, amma sakinlərin evlərinə su gəlmir.

Bizim.Media xəbər verir ki, söhbət Balakən rayonu, Hənifə kəndindən gedir.

Kəndin bir qrup sakini iddia edir ki, artezian quyusunun yaxınlığında yerləşən evlərə su gəlir, bir qədər aralıda yaşayanlar isə bundan məhrumdurlar. Məlumata görə, su təminatındakı çətinlik bir neçə aydır ki, davam edir.

Sakinlərin sözlərinə görə, aidiyyəti qurumlara müraciət edilsə də, nəticəsi yoxdur.

Məsələ ilə bağlı Hənifə kənd bələdiyyəsindən şifahi olaraq bildirilib ki, son aylar sakinlərin su problemi ilə bağlı müraciətləri əsasında ''Azərsu” ASC-nin mütəxəssisləri tərəfindən evlərdə yoxlamalar aparılıb.

Müxtəlif hissələrdə su xəttinə baxış keçirilib. Kənar müdaxilələrin olduğu müəyyən edilib. Su xəttinin bəzi hissələri asfalt örtüyünün altına düşdüyü üçün problemin səbəbini tam müəyyən etmək mümkün olmayıb. Sabah əraziyə yenidən mütəxəssislər cəlb olunacaq və xətlərə yenidən baxış keçiriləcək.
Mövzu ilə bağlı daha ətraflı XƏZƏR TV-nin hazırladığı videomaterialı təqdim edirik.

Bizim.Media