Tokayevdən İlham Əliyevə TELEFON ZƏNGİ

Azərbaycan və Qazaxıstan prezidentləri arasında telefon danışığı olub.

Bizim.Media xəbər verir ki, bu barədə informasiyanı Qazaxıstan prezidentinin mətbuat xidməti yayıb.

Qasım-Jomart Tokayev Qazaxıstan nümayəndələrinin də müşahidə etdiyi parlament seçkilərinin uğurla keçirilməsi münasibətilə İlham Əliyevi təbrik edib.

Qazaxıstan Prezidenti qeyd edib ki, Azərbaycan və Ermənistan arasında sülh müqaviləsinin bağlanması üzrə danışıqları üçün Almatı platformasını təmin etməyə hazırdır.

İlham Əliyev Bakının Astana ilə ikitərəfli münasibətlərin bütün spektri üzrə əməkdaşlığı daha da gücləndirmək üçün səylərini davam etdirmək niyyətində olduğunu bildirib.

Telefon danışığı zamanı Qasım-Jomart Tokayev V Ümumdünya Köçəri Oyunlarına nümayəndə heyətini göndərdiyinə görə İlham Əliyevə minnətdarlığını bildirib.

O, strateji tərəfdaşlıq ruhunda ikitərəfli ticarət-iqtisadi, mədəni-humanitar əməkdaşlığın yüksək dinamikasını qeyd edib.

Tokayev iki ölkə xalqlarının daha da yaxınlaşması üçün sentyabrın sonunda Qazaxıstanda Azərbaycan Mədəniyyəti Günlərinin keçirilməsinin vacibliyini vurğulayıb.

Bizim.Media