Yeni mina zərərsizləşdirən texnika Qarabağda sınaqdan keçiriləcək - FOTO

Azərbaycanda tank və piyada əleyhinə minaların, eyni zamanda partlamamış silah-sursatın zərərsizləşdirilməsi üçün nəzərdə tutulan texnika istehsal edilib.

Bizim.Media trend.az-a istinadən xəbər verir ki, "Improtex industries" zavodunun texniki işlər üzrə direktor müavini Cavidan Kərimov deyib.

O qeyd edib ki, digər texnikalarla minalar 95 faiz təmizlənirsə, bu yeni texnika ilə minalar tam olaraq təmizlənir.

"Bu texnika ilk dəfə bu gün sərgilənir. Sərgidən sonra bu ay sınaqlarına başlanılacaq və Cəbrayıl-Füzuli bölgəsində sınaqdan keçiriləcək", - deyə o əlavə edib.

Qeyd edək ki, Bakıda keçirilən "ADEX 2022" dördüncü Azərbaycan Beynəlxalq müdafiə sərgisi və “Securex Caspian” 13-cü Beynəlxalq Daxili Təhlükəsizlik, Mühafizə və Xilasetmə sərgisində 208 şirkət təmsil olunur.
İştirakçılar arasında Bolqarıstan, Çin, Fransa, İtaliya, Niderland və digər ölkələrin müdafiə sektorunun aparıcı şirkətləri təmsil olunur. Sərgiyə ilk dəfə İordaniyadan olan şirkətlər də qatılıb. Bu il 8 ölkə milli stendləri ilə iştirak edir.

Bizim.Media