Səlim Müslümov hakim qarşısına çıxarılır  

Sabiq əmək və əhalinin sosial müdafiəsi naziri Səlim Müslümovun barəsindəki cinayət işi üzrə istintaq başa çatıb. 

Bizim.Media xəbər verir ki, təqsirləndirilən şəxs barəsində toplanan cinayət işi materialları baxılması üçün Bakı Ağır Cinayətlər Məhkəməsinə göndərilib. 

Cinayət işi hakim Faiq Qəniyevin icraatına verilib. İş üzrə zərərçəkən qismində Maliyyə Nazirliyi tanınıb.  

Məhkəmənin hazırlıq iclasının vaxtı hələ ki məlum deyil. Qeyd edək ki, Səlim Müslümov DTX tərəfindən keçirilən xüsusi əməliyyatla həbs olunub. 

Sabiq nazir Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib.  
Sonra səhhətindəki problemlərlə bağlı o, ev dustaqlığına buraxılıb. 

Eldar Məmmədli, Bizim.Media