“Qalatasaray”ın prezidenti şəhidin atasına zəng etdi

Türkiyənin "Qalatasaray" futbol klubunun prezidenti Mustafa Cengiz komandanın şəhid Fərid Dursunovun atası Fazil Dursunova zəng edib.

Bizim.Media xəbər verir ki, bu barədə şəhidin atası məlumat verib.

Klubun rəhbəri  Azərbaycanın ərazi bütövlüyü uğrunda canından keçən Fəridlə qürur duyduğunu söyləyib.

O, şəhidimizin ailəsini yaxın vaxtlarda “Qalatasaray”ın ev oyunlarından birinə dəvət edəcəyini söyləyib. Həmin oyunda formalarda Fəridin adı yazılacaq.

M.Cengiz qəhrəman azarkeşin adının klubun muzeyində əbədiləşdiriləcəyini də vurğulayıb.

Fəridin atası deyib ki, Mustafa Cengizlə təxminən 15 dəqiqə söhbət edib.

Qeyd edək ki, Fərid Dursunov şəhid olmazdan öncə dostlarına deyib ki, “əgər şəhid olsam, məzarımın üzərində Azərbaycan bayrağı ilə yanaşı “Qalatasaray”ın da bayrağı dalğalansın”. 

Bizim.Media